Sońǵy eki jarym jyl ishinde brakonerlerge qatysty 4000-nan astam quqyqbuzýshylyq anyqtalyp, 58 zańsyz balyq aýlaýshynyń ústinen 35 qylmystyq is qozǵalǵan. Brakonerlerden jalpy somasy 125 mln teńge shyǵyn óndirildi, dep habarlaıdy Atyraý oblysy ákiminiń baspasóz qyzmeti.
QR ASHM Atyraý oblystyq orman sharýashylyǵy jáne janýarlar álemi aýmaqtyq ınspeksıasynyń basshysy Danıar Baımagambetovtiń aıtýynsha, barlyq quzyrly organdardyń birlesken jumystary nátıjesinde brakonerlikpen kúres keń kólemde júrgizilip keledi.
-Sońǵy eki jylda qoldanylǵan sharalar nátıjesinde brakonerlikpen kúres kúsheıdi, mysaly 2014-2015 jyldary 14 qylmystyq is qozǵalsa, 2016-2017 jyldary 35 boldy. Sońǵy eki jylda zańsyz balyq aýlaýshylar 125 mln teńge shyǵyndy ótedi, 2014-2015 jyldary – 33 mıl teńge bolǵan edi,-deıdi Danıar Baımaǵambetov. – 2016-2017 jyldary 11 myń balyq aýlaý quralyn, 600 júzý jáne kólik quraldaryn tárkiledik, mysal úshin 2014-2015 jyldary – 8500 aýlaý quraly men 367 kólik quraly tárkilengen edi.
Baımaǵambetovtiń aıtýynsha, qazir naqty nátıjeler bar.
- Aıta ketý kerek, kóp jyldan beri bıyl ǵana Jaıyq ózeninde ǵylymı-zertteý jumystary kezinde shoqyr balyǵynyń shabaqtary anyqtaldy, bul balyq qorǵaý jumystarynyń tıimdiligin kórsetedi, baǵaly balyq túrleri ýyldyryq shashatyn oryndaryna deıin jetti. Osylaısha bıyl bekireler jasandy túrde ǵana emes, tabıǵı túrde de óndiriledi,-deıdi Danıar Baımaǵambetov. –Memleket basshysy balyq qoryn bolashaq urpaqtarymyz úshin de saqtaý mindetin qoıdy. Qazir zańsyz balyq aýlaýmen kúsheıtilgen kúres nátıjesinde bolashaqqa úmitimiz paıda boldy.
Kúzgi balyq aýlaý maýsymynda balyq aýlaý kooperatıvterine beriletin lımıttiń ıgerilýine erekshe kóńil bólinip otyr. Balyq qabyldaý bólimsheleri qatań qadaǵalanady. Osy sharalar balyq sharýashylyǵy sýbektileriniń kvotany ıgerý mólsherin 87,3 paıyzǵa deıin arttyrýǵa yqpal etti, bul sońǵy 8 jyldaǵy eń joǵary kórsetkish.
-Ókinishke qaraı, keıbir balyq kooperatıvteriniń barlyq aýlaǵan balyqtaryn tirkemeý derekteri anyqtaldy, ol balyq aýlaýǵa berilgen lımıttiń tolyq ıgerilmeýine ákelip, kóleńkeli naryqty yntalandyrdy, - deıdi
Atyraý oblystyq orman sharýashylyǵy jáne janýarlar álemi aýmaqtyq ınspeksıasynyń basshysy.– Qazir ár resmı balyq aýlaý qaıyǵy men balyq qabyldaý bólimshelerin baqylaýda ustap otyrmyz, tabıǵat paıdalanýshylardyń zańmen belgilengen tártipte tek ruqsat etilgen balyq túrlerin aýlaýlaryn da qadaǵalaımyz.
