2018 jyldyń 6 aıynyń qorytyndysy boıynsha Qyzylorda oblysynda 1198 deklarasıa elektrondy túrde oryndalǵan. Bul týraly Qyzylorda oblysynyń Memlekettik kirister departamentiniń basshysy Serik Mustafaev Óńirlik komýnıkasıalar qyzmetinde ótken baspasóz konferensıasynda málimdedi.
«Kedendik deklarasıalaýdyń «Astana-1» aqparattyq júıesi de qazirgi kezde tolyqtaı qoldanysta. 2017 jyldyń qazan aıynan bastap «tranzıt» modýli tájirıbege engizilgen. Sodan beri 2035 tranzıttik deklarasıa osy júıede óńdeldi. 2018 jyldyń 6 aıynda 1198 deklarasıa (100%) elektrondy túrde rásimdeldi», – dedi S. Mustafaev.
Sondaı-aq, ol kóptegen qyzmetterdiń elektrondyq nusqaǵa kóshkenin atap ótti.
«2018 jyldyń 1 qańtarynan eskport rejımi, al 1 sáýirden bastap barlyq basqa rejımder elektrondy júıege kóshti», - dedi ol.
Óńirde «Salyqtyń jınalýyn kóterý» boıynsha birqatar jumystar atqarylyp jatyr. Osyǵan sáıkes, Qyzylorda oblysy boıynsha Memlekettik kirister departamenti 2018 jyldyń 1 jartyjyldyǵynda shoǵyrlandyrylǵan búdjetke 151,5 mlrd. teńge túsim túsýin qamtamasyz etti. Bul byltyrǵy jylmen salystyrǵanda 45,8 mlrd. teńgege artyq bolyp otyr. Sonymen qatar, aımaqta elektrondy shot-faktýra júıesin 15570 tulǵa qoldanǵan eken (zańdy jáne jeke kásipker).
Qyzylorda oblysy boıynsha MKD bas mamany B. Ordanovanyń aıtýynsha, elektrondy deklarasıalaý derekterdi tolyqtaı kodpen sıfrlandyrady jáne deklarasıany tolyqtaı óńdeıdi. Buǵan qosa, derekterdiń óńdelýin júzege asyrady.
Elektrondy deklarasıalaýdy endirý, ıaǵnı taýardy tazartýdyń jedel júıesi Qazaqstannyń eksporttyq áleýetin nyǵaıtýǵa jáne elimizdiń ınvestısıalyq tartymdylyǵyn kóterýge múmkindik beredi dep kútilýde.
Eske sala ketsek, elektrondy deklarasıalaý júıesi 2018 jyldyń 1 qańtarynda iske qosyldy. Ol Qazaqstan Respýblıkasy Qarjy mınıstrligi Memlekettik kirister komıteti bastamasymen qolǵa alynǵan bolatyn. Eń aldymen Astana-1 aqparattyq júıesi eksport rejımi boıynsha iske qosylǵan edi. Bul jańa júıe Dúnıejúzilik saýda uıymynyń talaptary men Qazaqstan Respýblıkasy jáne Eýrazıalyq ekonomıkalyq odaqtyń jańa keden zańnamasyna sáıkes saýdany jeńildetý maqsatynda jasalǵan. Buǵan deıin 2017 jyldyń 1 qazanynan bastap atalǵan júıeniń «Tranzıt» modýli engizilgen bolatyn. Júıeniń kóp fýnksıonaldylyǵy jáne birneshe aqparattyq baǵdarlamalardy bir negizgi platformaǵa biriktirilýi eskerile otyryp, Astana-1 júıesi kezeń-kezeńmen engizilmek.
