Jańa oqý jylynyń bastalýy qarsańynda QR BǴM nusqaýlyq hat daıyndap jatyr, onda jumys dápterleri — oqytýǵa arnalǵan qosymsha materıal ekeni jáne olardy qoldaný mindetti emestigi jazylǵan. Bul týraly QR Úkimeti otyrysynyń qorytyndysy boıynsha ótken baspasóz konferensıasy barysynda bilim jáne ǵylym vıse-mınıstri Asqat Aımaǵambetov aıtyp berdi.
QR Bilim jáne ǵylym mınıstrliginiń aqparatyna sáıkes, mektepterdiń ata-analarǵa bastaýysh synyptardyń oqýshylaryna jumys dápterlerin satyp alý týraly qoıǵan talaptary zańsyz.
«Jumys dápterlerin satyp alý jáne paıdalaný – mindetti emes. Bul oqýǵa arnalǵan qosymsha materıal, ony usynýǵa bolady, alaıda ony jalpylaı qoldaný mindettelmegen. Jumys dápterlerin satyp alý týraly talaptar zańsyz, sol sebepti osyndaı jaǵdaılarda biz tıisti sharalardy qabylaımyz. Degenmen, olardy paıdalanýǵa tyıym sala almaımyz. Sondaı-aq, túrli pánderge arnalǵan hrestomatıalar da bar, olar da oqýǵa mindettelmegen.
Búginde ata-analar oqýshylardyń mektepke ustaıtyn sómkeleri kitaptardyń kóptiginen óte aýyr ekenin aıtyp shaǵymdanady. Osynyń ózi sebep, óıtkeni keı jaǵdaılarda jumys dápterleriniń ózi kitaptyń kólemimen birdeı bolyp jatady, sondyqtan da qazirgi tańda QR BǴM Densaýlyq saqtaý mınıstrligimen birlesip, barlyq oqýlyqtar, jumys dápterleri jáne ózge de oqý quraldary boıynsha olardy sanıtarlyq normalarǵa saı keltirý jóninde naqty standarttar ázirlep jatyr», — dedi A. Aımaǵambetov.
Baspasóz konferensıasy barysynda vıse-mınıstr, sondaı-aq, bıyl Qazaqstanda pedagogıka qyzmetkerlerin atestattaýdyń jańa júıesi engizilgenin aıtty, onda muǵalimderdiń sanatyna baılanysty eńbekaqy kólemi ósedi jáne osy eńbekaqyǵa belgili bir ústeme qosylady.
«Eńbekaqyny ósirý týraly aıtqan kezde, eki jaǵdaıǵa baılanysty qarastyramyz. Birinshisi – búginde jańartylǵan baǵdarlamalar boıynsha jumys istep júrgen muǵalimderdiń eńbekaqysyn ósirý, bul — 205 myń muǵalim. Olar bul tólemdi qazirgi tańda alyp jatyr, tıisti qarajat respýblıkalyq búdjetten bólindi, transferttermen jergilikti búdjetterge baǵyttaldy. Ekinshisi – sanatqa qosylatyn qosymsha aqy. Endigi kezde oqytýshylardyń eńbekaqylarynyń kestesi saralanǵan túrde jáne ártúrli krıterıılerge baılanysty tólenedi», — dep túıindedi A. Aımaǵambetov.
Eske sala keteıik, búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda bilim berýdi jáne ǵylymdy damytýdyń 2016–2019 jyldarǵa arnalǵan memlekettik baǵdarlamasynyń osy jyldyń 6 aıynda iske asyrylý barysy, sondaı-aq Ulttyq biryńǵaı testileýdiń jáne oqýǵa túsý emtıhandarynyń qorytyndylary qaraldy.
