Búgin Almaty qalasynda 31 arnanyń uıymdastyrýymen halyqaralyq «I`m a singer» talant-shoýynyń ekinshi maýsymynyń tusaýy kesildi. Bıylǵy maýsymnyń syılyq qory 50 000 000 teńge! Qazaqstanda balamasy joq ǵalamat jobaǵa bul joly da álemniń ár túkpirinen eń myqty daýys ıeleri jınalady.
7 tamyz kúni Almaty qalasynda 31 arnadan efırge shyǵatyn «I`m a singer» halyqaralyq talant-shoýynyń ekinshi maýsymynyń bastalýyna oraı jýrnalıserge arnalǵan tańǵy as uıymdastyryldy. Joba jasaýshylar men sarapshylar jańa maýsymnyń basty jańalyqtarymen bólisip, resmı túrde joba kastınginiń aıaqtalǵanyn habarlady.
Jobanyń bas uıymdastyrýshysy – 31 arna bıyl ǵalamat sharanyń erejelerine birqatar ózgerister engizgen bolatyn. Budan bylaı shoýǵa 16 jasqa tolǵan, óziniń talantyna senimdi kez kelgen úmitker ótinish bildire alady. 31 arnanyń Bas dırektory Baǵdat Qojahmetovtyń aıtýynsha, Qazaqstan turǵynynyń da, ózge el azamatynyń da jobaǵa qatysýǵa qaqy bar. Ótinish qabyldaý 2018 jyldyń mamyr aıynda bastalyp, 28 shildede aıaqtaldy.
Jańa maýsymda jobaǵa shetelderden birqatar qatysýshylar keledi dep kútilýde. Sebebi búgingi tańda «I`m a singer» jobasyna úsh myńnan asa adam ótinish jiberdi. Olardyń arasynda Qazaqstan, Reseı, Ýkraına, Ózbekstan, Qyrǵyzstan, Ázirbaıjan, Iran, Armenıa jáne Belorýssıa memleketterinen nıet bildirgender de bar.
«Bul joba - kel kelgen mýzykalyq estradanyń dárgeıin kóteretin shoý, - deıdi 31 arnanyń Bas dırektory Baǵdat Qojahmetov. – Ol jaı ǵana án saıysy emes, ony juldyzdardyń óneri dep qaraý qate. Ol, eń aldymen, ózinshe dramtýrgıasy bar, ánshiniń ishki jan tebirenisin beıneleıtin biregeı joba. Mundaı jobalardyń basym bóligi kóptiń arasynan bireýdi sýyryp alyp shyǵyp, juldyz jasaýdy maqsat tutsa, bul shoýdyń maqsaty – kerisinshe, juldyzdyń da adam ekenin kórsetý. Uqsastyǵy, ekeýiniń de quraly – án».
Ekinshi maýsym 2018 jyldyń 9 qyrkúıeginde efırge jol tartyp, 31 arnadan kórsetiledi. Al MUZZON TV telearnasy sahnadaǵy ǵana emes, sahna syrtyndaǵy qyzyqty jaıttardy da kórermenge usynyp, jobanyń kúndeligin júrgizedi.
Bıylǵy maýsymda sarapshylar da naǵyz juldyzdardan quralǵan. Olardyń arasynda Sáken Maıǵazıev, Maqpal Júnisova syndy ánshiler bar.
«Qazaqstanda teńdesi joq mundaı aýqymdy halyqaralyq jobaǵa qatysý – men úshin úlken mártebe. Talanttarymyzdy óz kózimizben kórip, bir marqaıyp qalatyn boldyq. Mundaı shoýlar bolashaq jeńimpazdardyń, jas talanttardyń jolyn ashyp, úlken múmkindikter syılaıdy», - dedi sarapshy qazy Sáken Maıǵazıev.
Baspasóz konferensıasynda sóz sóılegender:
- Baǵdat Qojahmetov – 31 arnanyń Bas dırektory
- Sáken Maıgazıev – «MýzArt» tobynyń ánshisi, «I`m a singer» sarapshy qazysy;
- Altynbek Rahmetov – qazaqstandyq prodúser, rejıser;
2017 jyly kúz-qys telemaýsymynyń eń aýqymdy mýzykalyq oqıǵasy atanǵan «I’m a Singer» jobasynyń birinshi maýsymyna álemniń 6 elinen eń myqty 8 kásibı án oryndaýshy qatysyp, kórermenniń erekshe yqylasyn oıatqan bolatyn. Júzden júırik shyqqan ánshini tańdaýǵa sarapshylar ǵana emes, kórermender de atsalysty. Olar zalda otyryp ta, sms-habarlama arqyly da daýys berdi. «I’m a Singer» shoýynyń birinshi kezeńinde qazaqstandyq ánshi Qaırat Túntekov jeńiske jetti. Ol fınalda kórermenderdiń basym daýsyna ıe bolyp, qarsylastaryn basyp ozdy. Joba týraly tolyǵyraq singer.31.kz. saıtynan bile alasyzdar.
