Óskemen qalasynda ornalasqan «Vostochnık-3» seriktestiginiń múshesi, saıajaı kooperatıviniń turǵyny Qasembaeva Aıym Nurlanqyzy óziniń Facebook paraqshasynda turǵylyqty jerinde «Vostochnık-3» atty baýbaqsha qoǵamdastyǵynyń basshysy Shýshannıkov G.P esimdi Reseı azamatynan qysym kórip otyrǵanyn jazdy.
«Táýelsiz elde turyp, nege basqa eldiń azamatyna táýeldimiz?
«Vostochnık-3» atty baýbaqsha qoǵamdastyǵynyń basshysy Shýshannıkov G.P RESEI ELİNİŃ AZAMATY. Azamattyǵy reseılik bolsa da, Qazaqstanda turyp, qarakóz qazaqtarǵa ıelik etýde! Jasy jetpistiń aınalasynda bolsa da, oǵan eshkimniń ámiri júrmeıdi. Ol da ózin bul jerdiń qudaıy sezinedi-aý. Qazaqtardy mensinbeıtinine ózim talaı ret kýá boldym. Talaı ret ákimdikke, prokýratýraǵa aryz jazdyk. Biraq... Baýbaqsha qoǵamdastyǵy kimge qaraıtyny belgisiz! Sondyqtan bılik te sharasyz...
Baýbaqsha qoǵamdastyǵynyń elektr energıasy da sol bir tóraǵanyń ıeliginde. Eger onyń qalaýy bolsa, ol kez kelgen turǵyndy jaryqtan ajyrata alady. Ol sol quzyretin asyra paıdalanyp, qandaı da bir qujatqa kelisim jınaý barysynda, qarsylyq bildirgenderge elektr energıasyn qıamyn dep te kelistiredi. Qıylǵan qýatty qaıta qostyrýdyń ózi 8 myń teńge turady ǵoı... Al qısa, ony ońaılyqpen qosa qoımaıdy!
Turǵyndardyń atynan aryz jazyp, baýbaqsha qoǵamdastyǵynyń basshysyn aýystyraıyq desek, turǵyndardyń basym bóligi orys ultynyń azamattary. Qoǵamdastyqtyń problemalaryn birlese sheshý úshin qurylǵan alqa da bar, biraq ol alqanyń ózine óz qazaǵymyzdy tańdap turyp qossaq ta, shyǵyp qalady! Bul bassyzdyqty qalaı toqtatýǵa bolady? Aqyldaryńyz kerek aǵaıyn!» dep jazdy Aıym Qasembaeva.
Mán-jaıdy tolyǵyraq bilý úshin birden jazba avtoryna habarlastyq.
Saıajaı turǵyny Aıym Qasembaevanyń aıtýynsha, «Vostochnık-3» atty baýbaqsha qoǵamdastyǵy basshysy Shýshannıkov G.P ózi tártip ornatyp, oǵan kóndikpegenderdi «jaryqty qıyp tastaımyz» dep qyspaqqa alady.
- Keshe úıge kelsem, keshke úıdiń jaryǵyn qıyp ketipti. «Aldyn-ala nege eskertpeısizder?» dep elektrıkke habarlastym. Ol buǵan deıin talaı turǵynǵa aldyn-ala eskertemin dep basshylyqtan urys estigenin aıtady. (aýdıo jazbasy bar). Elektrık Shýshannıkovke kóbinde kishkentaı balalary bar ekenin alǵa tartyp, jaryqty keshke emes, tań erteń óshirýdi usynǵan. Alaıda qoǵamdastyq basshysy keshke eshkimge eskertpesten jaryqty qıý kerek ekenin aıtyp, óz degeninde turyp alǵan. Men ákimdikke shaǵym túsirdim. Olar "óz aralaryńdaǵy kelispeýshilik, biz kirise almaımyz" dedi. - deıdi Aıym Qasembaeva.
Aıymnyń saıajaıda turyp jatqanyna 6 jyldan astam ýaqyt bolǵan. Shýshannıkov sol jyldan beri saıajaıdy basqaryp keledi. Aıymnyń aıtýynsha, onyń jasy 70-ke kelgen. Zeınetkerlik jastan asyp ketse de, turǵyndardyń qyzmetine kóńili tolmasa da jumysyn toqtatpaǵan. Turǵyndar «Qaıdan ketsin, maı tamyp otyrǵan orynnan kim ketkisi keledi?» deıdi.
Aıym Qasembaevanyń aıtýynsha, Óskemen qalasynda «Vostochnık-3» atty baýbaqsha qoǵamdastyǵy aýmaǵynda 200-deı úı bar. Ár úıden jylda túrli sebeppen aqsha jınaıdy.
- Jyl saıyn biz 5 myń teńge múshelik kiris pen ár sotyq jer telimi úshin 2 myń teńge aqsha jınaımyz, deıdi.
Bul turǵyndar men qoǵamdastyq arasyndaǵy kelisimde kórsetilgen somma eken. Sondyqtan halyq ony tóleýden bas tartpaıdy.
Budan bólek qaýymdastyq basshysy jaryqqa aqsha tólemegenderden ústemaqy talap etedi eken. Onymen qoımaı, halyqqa til tıgizip, namysyna da tıetinin aıtady Aıym.
- «Vostochnık-3» atty baýbaqsha qoǵamdastyǵynyń basshysy Shýshannıkov G.P bizdi adam sanamaıdy. Keshe «Vy prıshlı s ýlısy» degende bárimiz shý ete tústik. Qoǵamdastyq ókili «ózderi bekitken ereje boıynsha júrgilerińiz kelmese basqa jerge kóship ketińder» dedi dep ashyndy turǵyn.
Aıym Qasembaeva barlyq jınalys orys tilinde júrgiziletinin, habarlandyrýlar tek orys tilinde jazylatyny aıtady.
-Biz «nege qazaq tiline aýdarmaısyńdar, jınalysty nege qazaq tilinde júrgizbeısińder?» desek, "Men senderge qazaqsha jazýǵa mindetti emespin. Biz memlekettik mekeme emespiz. Kerek bolsa ózderiń aýdaryp alyńdar" deıdi. Oıyna kelgenin isteıdi. Ýaqytynda tólemeseń ár adamǵa ústemaqy tóletkizedi. «Siz ústemaqy tóletetindeımsot emessiz» dep taǵy urysqanmyn.
Orys tilin bilmeıtinder, «Ne aıtty. Ne sheshti? dep bir-birinen suraıdy. Bul máseleni kóterip prokýratýranyń da, ákimdiktiń de tabaldyryǵyn tozdyrdyq. Alaıda olar qoǵamdastyqtyń memlekettik organ emes ekenin aıtyp, sharasyz ekenin jetkizdi. Bul qoǵamdastyq kimge qaraıdy belgisiz? Buǵan zań, sot degen joq pa sonda?, - deıdi Aıym Qasembaeva.
Bul máseleniń dendep, sheshimin taba almaı júrgenine birneshe jyldyń júzi boldy. Buǵan deıin Qamshy.kz aqparat agenttigi saıajaı turǵynynyń shaǵymyna qatysty máseleni kóterip, materıal jarıalaǵan edi. Ol kezde ákimdik atalmysh iske qyzyǵýshylyq tanytqandaı bolyp edi, alaıda eshteńe ózgermegen. Dál burynǵydaı jınalystar orys tilinde júrgizilgen, habarlamalar orys tilinde jazylǵan. Áli de solaı. «Baýbaqsha» qoǵamdastyǵynyń turǵyndardyń tilegine qulaq asar oıynda da joq.
Osydan bir jyl buryn atalmysh qaýymdastyqqa habarlasqanymyzda da, saıajaı turǵyndaryna da qoǵamdastyq ókili Tatána Iýrevna Mýrodák ózderiniń memlekettik organ bolǵandyqtan qujattar men jınalystardy eki tilde júrgizýge mindetti emes ekenin aıtqan edi.
Qurmetti, «Vostochnık-3» atty baýbaqsha qoǵamdastyǵy! QR Zańyna sáıkes, til týraly zań barlyq Qazaqstan terıtorıasyndaǵy mekemege tıesili ekenin eske salamyz.
İs qaǵazdardy qazaq tilinde júrgizý, halyqqa eki tilde de aqparatty jetkizý sekildi zań barlyǵyna ortaq! Árbir Qazaqstan azamaty men Qazaqstan terıtorıasynda turyp jatqan, eńbek etip júrgen, kásibin júrgizip otyrǵan azamattar Qazaqstannyń bekitken zańyna moıynsynýǵa, QR Ata-zańynda kórsetilgen ereje boıynsha júrip-turýǵa mindetti.
Qamshy.kz aqparat agenttigi osy máseleni óz nazarynda ustaıdy. QR Bas prokýratýraǵa, Joǵary sotqa, UQK-ge resmı hat joldaımyz.
