Brıtanıa patshaıymy qazaqstandyq qyzben kezdese almaıtynyn jetkizdi, dep habarlaıdy Qamshy.kz aqparat agenttigi sputniknews.kz saıtyna silteme jasaı otyryp. 

Aqtóbe turǵyny Zarına Ahmetjan II Elızavetaǵa hat jazyp, odan birneshe aıdan keıin jaýap aldy. Patshaıym qazaqstandyqpen jeke kezdesýden bas tartqanyna qaramastan, ol Anglıada oqýdy armandaýyn jalǵastyra bermek. 

II Elızavetaǵa hat jazý ıdeıasy Zarına Ahmetjanǵa kezdeısoq kelgen. Bala kúninen aǵylshyn mádenıetine qyzyǵýshylyq tanytqan qyz, mektepte júrgende-aq Anglıaǵa barýdy aldyna maqsat etip qoıypty.  

Ol birneshe jyl boıy aǵylshyn tilin úırenip, memlekettiń tarıhy men halyqtyń dástúrimen tanysqan. Tildi erkin meńgergenin túsingen kezde patshaıymnyń ózine hat jazyp, jeke kezdesý ótkizýdi ótinedi. 

"Bir aı jazsam ba, jazbasam ba dep oılanyp júrdim", — dedi Zarına. 

Sonymen birge, Zarınanyń óziniń aıtýynsha, Býkıngem saraıynan jaýap alamyn dep úmittenbegen. Alaıda patshaıymnyń aty-jóniniń bas áripteri jazylǵan konvertti alǵanda qatty tańǵalypty.    

"Ol (II Elızaveta) meniń hatymdy baǵalaıtynyn, alaıda kezdeskisi keletin adamdardyń barlyǵymen kezdesýge múmkindigi joq ekenin jazdy", — deıdi Zarına.

Soǵan qaramastan Ulybrıtanıa patshaıymy hatpen birge estelike óziniń sýretin salyp jiberipti. 

Endi Zarına Ahmetjannyń Anglıada oqýǵa degen yqylasy odan saıyn arta tústi. Qazirdiń ózinde emtıhanǵa tıanaqty daıyndalyp jatyr, bala kúninen armandaǵan elde oqý úshin qoldan kelgenniń bárin jasap kórmek.