Býhareste bolǵan narazylyq sherýiniń saldarynan 400-ge jýyq adam zardap shekti. Bul jaıynda Qamshy.kz aqparat agenttigi Azattyq radıosyna silteme jasap habarlaıdy.

Rýmynıa halqy bılikke qarsy narazylyq sherýin uıymdastyryp, bıliktiń otstavkaǵa ketýin jáne jańa parlament saılaýyn uıymdastyrýdy talap etýde. Olar qazirgi Sosıal-demokratıalyq partıany jemqorlyqqa aıyptap, «Urylar partıasy» dep atady. Túrli derekterde kórsetilgendeı, narazylyq sherýine bar-joǵy 60-100 adam qatysqan eken. Jergilikti polısıa ókilderi mıtıń bolǵan jerden 33 adamdy tutqyndaǵanyn aıtty. Segiz qylmystyq is qozǵalǵan.

Narazylyq bildirýshiler Býharestegi ortalyq alańǵa jınalyp, joldardy jaýyp tastaǵan. Keıinnen sý toltyrylǵan bótelkelerdi laqtyra bastaǵan. Oqıǵa ornyna dereý jetken polısıa qyzmetkerleri narazylyq bildirýshilerdi qysyp, olarǵa qarsy ýly gaz, sý shashatyn quraldar men jaryq shyǵaratyn granatalardy paıdalanǵan.

Prezıdent Klaýs Iohannıs polısıa qyzmetkerleriniń bul is-áreketin tym qatigez dep synap, İİM-de túsinikteme berýdi talap etti.

Narazylyq sherýiniń qozǵaýshy kúshi shetelderde oqyp, bilim alyp júrgen rýmyndar boldy.

Aıta keteıik, 2014 jyly bolǵan prezıdent sa ılaýynda Klaýs Iohannıs jeńiske jetken bolatyn. Ol dál sol shetel dıasporasynyń qoldaýymen jeńgen eken. 2016 jyly bolǵan parlament saılaýynda sosıal-demokratıalyq partıa jeńip shyqqan. Prezıdenttiń jaqtastary Eldegi sosıal-demokratıalyq partıany jemqor dep aıyptasa, partıa jaqtastary Rýmynıa prezıdentine bıligin asyra paıdalandy dep aıyp taǵýda.