Elimizde jalǵandy jalpaǵynan basyp júrgender buzaqylyq is-áreketter jasap júrse de zańdy óz kereginshe burmalap, jazadan qutylyp ketip jatyr. Zańsyz is-áreketter jaıynda halyqtyń aıta-aıta aýyzy da talyp ketti. Qoǵamda tek quzyrly organdarda tanysy barlardyń múmkindigi shekteýsiz degen pikir beleń alyp ketken. Quzyrly organdardyń salǵyrttyǵynan sanyn soǵyp, ádildik izdep shyr-pyr bolyp júrgen bir jeli qoldanýshysynyń oqıǵasyn Qamshy.kz aqparat agenttigi nazarlaryńyzǵa usynady.

«Jazyp otyryp kózime jas keldi, bar úmit tek qarapaıym halyqta, sebebi bizdiń quqyǵymyzdy qorǵaýy tıis adamdar, shyn máninde, kerisinshe ony taptap, «óziniń tanystaryn» qorǵaýda. 5 tamyz kúni jantúrshigerlik oqıǵa oryn aldy, oǵan kináli adamdar tıisti jazasyn almaı otyr.

5 tamyz saǵat 00:30 shamasynda Astana qalasyndaǵy Saraıshyq kóshesinde úlken jol apaty boldy – ázirbaıjan ultynyń adamy, ózi mas BMW markaly kóligimen qarsy betke shyǵyp ketip, 4 kólikti, bizdiń kóligimizdi qosa soǵyp ótti. Tórt  kólikke de aıtarlyqtaı zaqym kelgen, úsheýi júrýge jaramaı tur. Jol apatyna kináli er adamdy jedel járdem alyp ketken edi, 20-30 mınýttan keıin ol jerden qashyp ketipti. Keıinnen 1 kún ótkennen soń jaraqattanǵan kúıinde qaıtyp keldi, alaıda ol medısınalyq saraptama men tergeýden ótpedi. Aıdap júrgen kóligi onyki emes, dosynyń kóligi eken, ekeýiniń de saqtandyrý qujattary joq. Kóliktiń ıesi, ıaǵnı kináliniń dosy jol apaty bolǵan jerge kelgen, ózi kásibı kólik aıdaýshy, ári Parlament senatynyń depýtattyǵyna úmitker eken, búginde Astana ákimdiginiń Quqyq bóliminiń bas mamany qyzmetin atqarady eken.

Jol apatyna qatysty qylmystyq is jyljymaı, toqtap qaldy, kináli adamdardyń eshbirinen túsinikteme alynbady. Forma kıgen tergeýshi ne sebepti osy ýaqytqa deıin jol apatyna kináli adam men kóliktiń ıesin, sol oqıǵa bolǵan kezde bizben birge bolǵan adamdardy tergemegenin aıtpaı otyr. Kólik ıesiniń bul iske eshqandaı qatysy joq deıdi. Al aýrýhanada jatqan jol apatyna kináli dosyna kúnige forma kıgen adamdar kelip, áńgime-dúken quryp otyrady», - dep kúıinedi japa shegýshi Lúdmıla Kravchenko.

Onyń aıtýynsha, kúıeýi ekeýi kólikti 3,5 jylǵa nesıege alǵan eken. Búginde bar kúnkórisi sol kólikke qatysty bolǵan otbasy jumyssyz qaldyq dep kúıinip otyr.

«Kóligimizge aıtarlyqtaı zaqym kelgen, ony jóndetýge qarajatymyz jetpeı otyr. Tek biz ǵana emes, japa shekken qalǵan úsh kóliktiń ıesi de dál bizdiń jaǵdaıymyzdy keship otyr. Sonda eger seniń tanysyń nemese quzyretti kókeń bolmasa basqalar seniń quqyǵyńdy taptaýǵa múmkindigi bar ma. Kóligimiz buzylyp, japa shekken 4 júrgizýshi bir apta boıy tabanymyzdan  tozyp, eń quryǵanda kinálilerdi tergeýge alar dep kútýdemiz. Kóptegen adamdar bizdi jubatyp, qoldarynan kelgenshe kómek kórsetýde. Al oqıǵaǵa kináli men onyń dostary jáne kóliktiń ıesi bizdiń ústimizden kúlip, mazaq etedi.

Men ózim muǵalim bolyp qyzmet atqaramyn, balalardy únemi azamattyq pozısıaǵa úıretip, ádildik pen shyndyq bar dep aıtyp, sońyna deıin patrıot boldym. Adal eńbekpen aqsha taýyp júrgen adamdar ádiletsizdikke tap bolmaıdy dep oılap edim...», - deıdi jábirlenýshi.