Taraz qalasyndaǵy "Atletık" sport kesheninde muǵalim namaz oqyp jatqan oqýshylardy balaǵattap, bólmeden qýyp shyqqan edi. Bul vıdeo áleýmettik jelide qyzý talqylanyp jatyr. Óz kezeginde Jambyl oblysy ákimdiginiń deneshynyqtyrý jáne sport basqarmasynyń basshysy bul oqıǵaǵa baılanysty jaýapty adamdardyń jazalanatynyn málimdedi. Atalǵan oqıǵaǵa baılanysty, Qamshy.kz aqparat agenttiginiń tilshisi QMDB baspasóz qyzmetiniń jetekshisi Aǵabek Qonarbaıulyna habarlasqan bolatyn. Aǵabek Qonarbaıuly, muǵalimniń áreketin adamgershilikke jat qylyq dep synǵa aldy. 

"Bizdiń halqymyz namaz, jaınamaz syndy sharıǵattyń asyl qundylyqtaryn qurmettep, qadirlegen. Dinimizde namaz oqyǵan adamǵa kedergi keltirý bylaı tursyn, onyń aldynan kesip ótýge áste bolmaıdy. Al aqparat quraldarynda tarap ketken beınejazbada er azamat namazǵa jyǵylǵan jas balany balaǵattaǵanymen qoımaı, jaınamazyn julyp, jelkesinen ıterip jiberipti. Bul – adamgershilikke jat qylyq. Onyń óreskel áreketin qatań aıyptaımyz. Dinı tózimsizdik qulshylyqqa qurmetsizdik peıilden bastalady", - deıdi Aǵabek Qonarbaıuly.