Máýlen Áshimbaev óziniń feısbýk paraqshasynda jamaǵattan súıinshi suraı otyra, jańa taǵaıyndaýdy jarıa etti dep habarlaıdy Qamshy.kz aqparat agenttigi.
"Bilikti maman, óz isiniń sheberi Raýan Kenjehanuly «Nur Otan» partıasy Tóraǵasynyń Birinshi orynbasarynyń keńesshisi bolyp taǵaıyndaldy.
Raýan kópshilikke belgili jýrnalıs, qoǵam qaıratkeri, kóptegen jobalardyń avtory retinde jaqsy tanymal. Onyń bastamasymen júzege asyrylǵan jobalar qazaqstandyqtardyń zıatkerlik áleýetin arttyryp, otandyq bilim salasynyń jańa úrdisterge saı damýyna jol ashty. Sondaı-aq Raýan Kenjehanuly áıgili Vıkıpedıany qazaqsha sóıletip, ana tilimizdiń aıasyn keńeıtýge úlken úles qosty. Qazaq tiliniń Google aýdarma júıesine engizilýine de sińirgen eńbegi zor.
Raýan memlekettik qyzmette de ózin jaqsy qyrynan kórsetip, mol tájirıbe jınady. Qazirgi tańda ol elimizdiń rýhanı ómirin damytý jolynda aıanbaı eńbek etip keledi. «Rýhanı jańǵyrý» baǵdarlamasy aıasynda qolǵa alynǵan «Qazaq tilindegi 100 jańa oqýlyq» jobasyn júzege asyrýda Raýannyń eren eńbegin erekshe atap ótken jón. Ol basqaratyn «Ulttyq aýdarma búrosy» sáýir aıynda jobanyń alǵashqy jemisi retinde álemniń eń úzdik joǵary oqý oryndarynda oqytylatyn 18 oqýlyqty qazaq tiline aýdarǵanyn jaqsy bilemiz. Aldaǵy ýaqytta da Raýan rýhanı jańǵyrý aıasyndaǵy jumystardy jalǵastyryp, onyń basshylyǵymen aýdarma búrosy mundaı oqýlyqtardyń qataryn tolyqtyra túsedi degen oıdamyz jáne soǵan tilektespiz.
Sonymen qatar Raýan Kenjehanuly basqa da tyń jobalardy partıa qatarynda júrip júzege asyrady dep senemiz. Ol úshin partıa jan-jaqty qoldaý kórsetýge daıyn. Sondyqtan Raýanǵa aldaǵy qyzmetine tek tabys pen sáttilik tileımiz!"
