Keshe ǵana Qurban aıt merekesi dep qýandyq, toıladyq, týǵan-týystyń úıine aıttap bardyq. Er adamdar bazardan shama sharqy jetkeninshe qurbandyqqa shalynatyn maldy tańdady. Qudaıdyń razylyǵynan úmit kútken musylman qaýym shalǵan qurbandyqtaryn jaǵdaıy joqtarǵa taratyp berse, endi biri bes paryzdyń biri qajylyqqa baryp jatty. Qurban aıtta árbir musylman óziniń jomarttyǵy men adamshylyǵyn, meıirimdiligin kórsetýge tyrysady. Islam dinidegi bul mereke tek qurbandyq shalýmen ǵana shektelmeıtini belgili. Bul meıramda ár musylmannyń pendeshiligi, jomarttyǵy, taqýalyǵy synǵa túsedi.  Qurbandyq shalýdyń  negizgi mánisi de osy edi.

Biraq  Islam dini tazalyqtan bastalady degendi keıbir musylmandar umytqan sekildi. Sebebi feısbýk áleýmettik jelisinde orys tildi azamatsha «Meıramdy toılap, qoılaryn soıyp, qaldyqtaryn tastap ketken. Osyǵan jaýapty azamattar qaıda qarap otyrǵany túsiniksiz? Bul jerdegi ıisti sózben aıtyp jetkizý, shydap turý múmkin emes. Musylmandar, et dámdi bolǵan shyǵar dep oılaımyn», dep musylmandardy qatań synǵa aldy. 

Iá, bul azamatshanyń aıtqany ras. Sebebi meıramdy toılaǵandardyń las qaldyqtarynan nege basqa adamdar japa shegý kerek? Kerisinshe, ózge ult ta, ózge din ókili de Qurban aıt meıramy týraly jaqsy pikir bildirip, tamsana qaraý kerek emes pe?! 

Qamshy.kz aqparat agenttiginiń tilshisi osy suraqtardyń jaýabyn bilmek bolyp birneshe dintanýshy men Almaty qalasynyń ımamdaryna habarlasqan bolatyn. Alaıda 10 shaqty dintanýshy men ımamdar Islamdaǵy ysyrapshylyq týraly pikir bildire almady. Sondyqtan, oqyrman, sizderge Islamdaǵy ysyrapshylyq týraly ǵalamtordaǵy aqparatty usynýǵa májbúrmin.

«Asyl dinimiz Allanyń týra joly Islamda ysyrapqa baılanysty taǵylymdy hadıs sháripter  jeterlik.

Qasıetti Qurankárimde: «İshińder, jeńder, biraq ysyrap qylmańdar. Shyndyǵynda, Alla Taǵala ysyrap qylýshylardy súımeıdi», – delingen [Aǵraf súresi 31 aıat]. Iaǵnı ysyrap etýshilerdi Uly Jaratýshy jaratpaıdy deıdi. Alla Taǵalanyń meırimine bólenýdi oılasaq, barymyzdy ornymen jumsaý mańyzdy.

Alla Taǵala Quran aıatynda bylaı deıdi: «Shynynda ysyrapqorlar Shaıtannyń týysy. Al shaıtan, Rabbysyna óte qarsy» (Isra súresi 27-aıat)dep ysyrapshyldyqqa baılanysty tereń túsinikte aıtylǵan. Dúnıe, baılyqty , kúsh-qýatty ýaqytty ysyrapsyz ornymen jumsaýdy Alla Taǵala bizge mindet etken. Ysyrapqa barmaý baılyq pen qanaǵattyń jáne berekeniń bastaýy bolmaq», — delingen mazhab.kz saıtynda.