Elbasy kimge senedi? Elbasynyń janynda keı sheneýnikter birneshe jyldan beri jyly oryndaryn ǵana aýystyryp qyzmet atqaryp júr. Shendilerdiń birin halyq aspanǵa kóterip maqtasa, endi birin dattap, tipti ashshy tilderimen taptap tastaıdy. Qaısysyn maqtap, qaısysyn dattaıtynyn ishińiz biler, ol jaǵyn ózińizge qaldyrdym, qurmetti oqyrman! Qamshy.kz aqparat agenttigi Elbasynyń senimdi serikterine aınalǵan shendilerdiń tizimin oqyrman nazaryna usynýdy jón kórdi.
Imanǵalı Tasmaǵambetov
1956 jyly jeltoqsannyń 9 Gýrev oblysy, Mahambet aýdany, Novobogat aýylynda dúnıege kelgen. 1979 jyly Oral qalasynyń A. S. Pýshkın atyndaǵy pedagogıkalyq ınstıtýtynyń geografıa men bıologıa pánderiniń muǵalimi mamandyǵy boıynsha dıplomyn aldy. Halyqtyń qoshemetine bólengen Imanǵalı Tasmaǵambetov óziniń eńbek jolyn qazirgi Atyraý qalasy Mahambet aýdanyndaǵy balalar men jasóspirimderge arnalǵan sport mektebinde bapkerlikten bastaǵanyn bireý bilse, bireý bilmes.
Keıin 1981 jyldan 1991 jylǵa deıin KOKP OK-tyń múshesi, 1990-1991 jyldarda Qazaqstan kompartıasynyń OK Polıtbúro múshesi boldy. Qazaqstan Recpýblıkasynyń 12- shaqyrylǵan Joǵarǵy Keńesiniń depýtaty bolyp saılandy.
Al saıası ómirbaıany sol kezdegi jalǵyz jastar saıası uıymy — Qazaqstannyń LKJO-da basshylyq qyzmetimen baılanysty. 1979 jyldan Mahambet aýdanyndaǵy LKJO uıymdastyrý bóliminiń meńgerýshisi, Gýrev LKJO qalalyq komıtetiniń jáne oblystyq komıtetiniń birinshi hatshysy boldy. 1989 jyly LKJO OK, 1991 jyly Qazaqstan Respýblıkasynyń jastar isi jónindegi Memlekettik komıtetin basqardy.
Qazaq eli táýelsizdik alǵannan keıin araǵa 2 jyl salyp Imanǵalı Tasmaǵambetov QR Prezıdentiniń kómekshisi bolyp taǵaıyndaldy.
1995 jyldan bastap el basqarýshy qyzmetinde joǵarǵy oryndardy atqaryp, Qazaqstannyń vıse-premeri, bilim jáne mádenıet vıse-premer-mınıstri, Qazaqstan Respýblıkasynyń Prezıdenti ákimshiliginiń jetekshisiniń orynbasary, Qazaqstan Prezıdentiniń birinshi kómekshisi, Atyraý oblysynyń ákimi, Qazaqstan premer-mınıstri, Memlekettik hatshy, Qazaqstan Prezıdenti ákimshiliginiń jetekshisi bolady.
2004—2008 jyldary 1,5 mln turǵyny bar Qazaqstannyń eń iri qalasy Almatynyń , 2008 j. sáýirdiń 4 Qazaqstannyń elordasy — Astana qala ákimi bop taǵaıyndaldy. Qazirgi ýaqytta Imanǵalı Tasmaǵambetov QR-nyń RF-daǵy Tótenshe jáne ókiletti elshisi retinde qyzmet atqaryp júr. Bıylǵy jyldyń mamyrynda Reseı eliniń Rjev qalasynda qazaqsha sóılep eldiń súıispenshiligine bólengen edi. Árıne óz elimizde júrip qazaq tilin mensinbeıtin shendilerdiń qasynda Imanǵalı Tasmaǵambetovtyń orny bólek, bedeli asqaq.
Kárim Másimov
1965 jyly qazirgi Astana qalasynda dúnıege kelgen. Ulty uıǵyr bolýy bek múmkin, alaıda naqty belgisiz dúnıe. Ákesi Qajmuqan Qasymuly Másimov kezinde kirpish zaýytynyń dırektory bolǵan. Al Qajmuqannyń uly Kárim eńbek jolyn 1991 jyly - Qytaı Halyq Respýblıkasyndaǵy KSRO Saýda ókildiginiń quqyqtyq máseleler boıynsha keńesshisi bolyp bastaǵan. Halyqtyń esinde jyly ornyn uzaq ýaqyt saqtap qala alǵan Úkimet basshysy retinde este qalǵan. 2007 jyly premer-mınıstrlikke Másimov taǵaıyndaldy.
2012-2014 jyldary premer-mınıstr qyzmetin Serik Ahmetov atqarsa, 2014-2016 jyldary Úkimet basyna Kárim Másimov oraldy. Úkimet basshysy bolǵan kezdegi bir jylda bir-aq ret Atyraý oblysynyń jańa ákimin zıaly qaýymǵa tanystyrý úshin is saparǵa shyqqan. Eń alǵash ret Úkimet otyrysyn bastan-aıaq qazaqsha júrgizgen Úkimet basshysy bolyp tarıhta qaldy. Sebebi Qazaqstan úshin bul maqtanarlyq jaıt.
Kárim Másimov qazir 2016 jyly Qazaqstan Respýblıkasy Ulttyq qaýipsizdik komıtetiniń tóraǵasy bolyp taǵaıyndaldy. Ázirge Másimovtiń qyzmetten ketetin túri joq. Elimizdiń qaýipsizdigin qamtamasyz etedi dep úmittenýden basqa amal da joq syqyldy.
Ádilbek Ryskeldiuly Jaqsybekov
1954 jyly Qostanaı oblysy Qarabalyq aýdanyny Bórili aýylynda dúnıege kelgen. 1988—95 jj. kópsalaly «Sesna» korporasıasynyń basshysy retinde qyzmet atqarady.
1995 j. Qazaqstan Respýblıkasy Parlamentiniń Senatyna saılanyp, 1996 j. Aqmola oblysy ákiminiń orynbasary qyzmetine taǵaıyndalady.
Saıası qaıratker retinde Nursultan Nazarbaevty ıdeal sanaıtyn Ádilbek Jaqsybekov 1997 j. jeltoqsanynan 2003 j. maýsymyna deıin Astana qalasynyń ákimi atanady. Ádilbek Jaqsybekovty «Elbasynyń kóleńkesi», «Elbasynyń oń qoly», - dep te ataıtyndar bar.
2003 j. shildesinen 2004 j. jeltoqsanyna deıin Qazaqstan Respýblıkasy Indýstrıa jáne saýda mınıstri atandy.
2008-2009 jyldary – Qazaqstan Respýblıkasynyń Reseı Federasıasyndaǵy Tótenshe jáne Ókiletti Elshisi, 2009-2014 jyldary – Qazaqstan Respýblıkasynyń Qorǵanys mınıstri bolyp qyzmet atqardy.
2014 jylǵy sáýir men qazan aralyǵynda – Qazaqstan Respýblıkasynyń Memlekettik hatshysy boldy. Keıin qaıtadan 2014-2016 jyldary – Astana qalasynyń ákimi bolyp taǵaıyndaldy.
2016 jylǵy 21 maýsymda Qazaqstan Respýblıkasy Prezıdenti Ákimshiliginiń Basshysy bolyp taǵaıyndalǵan Ádilbek Jaqsybekovty synaýshylar qatary az.
Marat Tájın Muhanbetqazyuly
Sosıologıa ǵylymdarynyń doktory Marat Tájın 1960 jyly Aqtóbe qalasynda týǵan. Almaty halyq sharýashylyǵy ınstıtýtyn jáne S.M.Kırov atyndaǵy Qazaq memlekettik ýnıversıtetiniń aspırantýrasyn bitirgen soń 1992 jylǵa deıin ǵylymı-oqytýshylyq qyzmetpen aınalysady. 1992 jyldan bastap Qazaqstan Respýblıkasy Prezıdenti men Mınıstrler Kabınetiniń Apparatynda: İshki saıasat bólimi meńgerýshisiniń birinshi orynbasary, osy bólimniń meńgerýshisi, QR Prezıdenti Apparaty Basshysynyń orynbasary jáne Aqparattyq-taldaý ortalyǵynyń basshysy retinde jumys isteıdi.
1994—1995 jj. — Qazaqstan Respýblıkasy Prezıdentiniń Memlekettik keńesshisi, 1995—1999 jj. — Prezıdent Ákimshiligi Basshysynyń orynbasary jáne Prezıdent Ákimshiligi Taldaý jáne strategıalyq zertteý ortalyǵynyń basshysy bolyp taǵaıyndalady.
1999—2001 jj. — Prezıdenttiń Ulttyq qaýipsizdik máseleleri jónindegi kómekshisi — Qazaqstan Respýblıkasy Qaýipsizdik Keńesiniń Hatshysy bolyp qyzmet atqarady.
Al 2017 jylǵy qańtardan bastap – Qazaqstan Respýblıkasy Prezıdenti Ákimshiligi basshysynyń birinshi orynbasary.
