Astanada QR Ulttyq sport túrleri qaýymdastyǵynyń Prezıdenti Bekbolat Tileýhan jýrnalıserdiń basyn qosyp, brıfıń ótkizgen bolatyn. Respýblıkalyq BAQ jarysa jazǵan brıfıńtiń Alataýdyń bókterinde emes, Saryarqa tórinde uıymdastyrylǵany almatylyqtardy qynjyltty. Sebebi qolynda qamshysy bar, ataq pen abyroıdan kende emes, el aýzynda júrgen azamattyń aýzynan mundaı jalyndy sózderdi kúnde bizdiń elde estı bermeımiz. Jańalyq jazýǵa asyǵyp turǵan jýrnalıserge sensasıany óz qolymen tabaqqa salyp usynǵan Bekbolat Tileýhan tań qaldyrmaı qoımady.
"Ornyńyzdan ketýge daıynsyz ba?" degen suraqqa oılanbastan bas ızegen jyraýǵa súısinip otyrmyz. Bylǵary kresloǵa otyryp alsa, bitti, jyly ornyn ózgege bosatýǵa qımaıtyn shendilerden halyq zárazap bolǵany shyndyq. Tek Bekbolat myrzanyń bir eskertýi bar. Jańadan keletin adamnyń shynymen de ulttyq sporttan habary bolýy jáne janashyr bolýy mindetti. Sol shartpen ǵana Bekbolat Qanaıuly óziniń batasyn berýge daıyn. "Meniń aıtqan dúnıeni 18 mln adam estıtin bolady dep oılaımyn. Taǵy da túsindirip keteıin, men ataq úshin júrgen adam emespin. Qolymnan kelgenin jasadym" dep aǵynan jarylypty namysty azamat. Kúni keshe ǵana ótken Dúnıejúzilik Kóshpendiler oıynynda jeńisti qoldan berip qoıǵan Qazaqstannyń kókpar quramasynyń oıyny, olardyń jylqylarynyń bolmaýy degendeı absýrdty dúnıeler osyndaı oıǵa Bekbolat myrzany jetelegen bolýy kerek. "Qyrǵyzstanǵa nege eresekter komandasyn jibermedińiz?" degen suraqqa Bekbolat esh saspastan "Eresekter komandasyn jibersek, biz jeńetin edik. Ol túsinikti jaıt qoı. Sondyqtan da jastar baǵyn synasyn dedik. Synady. Oınady. Bári jaqsy", - dep jaýap qatypty. Tek bir suraqtyń jaýabyn ala almaı qaldyq. Ol - "Qyrǵyzdan at suraıtyndaı jaǵdaıymyz sondaı múshkil me?" degen suraq.
"Er jigittiń eki sóılegeni - ólgeni" deıdi halyq. Qazaq halqy sonymen qatar "Atty qamshy aıdaıdy, erdi namys aıdaıdy" dep sóz qaldyrǵan artynan. Bekbolat Qanaıuly bastaǵan osy bir "chellendj" (eshkim jasamaǵan dúnıeni jasaýǵa degen umtylys, óz-ózińdi qaıraý) bıliktiń basynda otyrǵandarǵan qoldaý tapsa, mereıimiz ústem bolar edi.
