Avtomobıl joldary komıteti Aqtóbe oblystyq departamentiniń burynǵy dırektory, qazir zeınetker Baǵlan Baımaǵambetov óziniń Elbasymen kezdeskenin kúni búgingi oqıǵadaı erekshe yqylaspen  áńgimelep berdi.

  - Eń bastysy, - deıdi ol, Elbasynyń kóregen saıasatynyń arqasynda júzege asyp jatqan búkilhalyqtyq iske qolymnan kelgenshe úles qosyp, álemde jańa bir memleket qurý qadamyna atsalysqanymdy taǵdyrdyń syıy, ómirimniń jaýapty sátteri dep eseptep, maqtan tutamyn. Álem moıyndaǵan kemeńger tulǵa, qazaqtyń baqytyna jaralǵan birtýar azamaty Nursultan Ábishuly Nazarbaevpen ótken ǵasyrdyń sońǵy onjyldyǵynan beri kezdesip kelemin. Oblys, el kóleminde onyń strategıalyq saıasatyn qoldap, sodan týyndaıtyn mindetterdi júzege asyrýǵa qoldan kelgenshe atsalysyp kelemin. 1998 jyldyń qazan aıynda elimizdiń birqatar oblystaryndaǵy iri kásiporyndardyń basshylary Aqtóbe oblysynyń ákimi Aslan Mýsınge Aqtóbe qalasynda Qazaqstan Azamattyq partıasynyń quryltaı sezin ótkizý týraly usynys jasap, ol qabyldanǵan bolatyn.

Azamattyq partıasynyń quryltaı sezinde

Sol jyldyń 17 qarashasy kúni «Qonys» sport saraıynda ótken quryltaı sezine eńbek ujymdary men qoǵamdyq uıymdardan saılanǵan 2826 delegattyń 2786 qatysty. Osy sıezi sol kezderi Aqtóbe memlekettik azyq-túlik korporasıasynyń prezıdenti, yntaly toptyń jetekshisi bolǵan ózim júrgizip otyrý abyroıyna ıe boldym. Prezıdenttik saılaýǵa túsken Nursultan Ábishuly osy basqosýda sóz sóılep, sıez jumysyna oń baǵa berip,  rızashylyǵyn bildirdi. Bul bizdiń eńbegimizge berilgen eń joǵary baǵa bolyp tabylǵan-dy. Bul saıası shara týraly kezinde elimizdiń BAQ túgeldeı jazyp, habarlaǵan bolatyn. Ýaqyt talabyna saı keıingi jyldary «Nur Otan» partıasyna qosylǵan Azamattyq partıa el saıasatyna óziniń salmaqty úlesin qosty. Aqtóbelik Parlament depýtattary Amangeldi Aıtaly, Sánıa Qaldyǵulova men Bolat Ábishevter saıasat tórine bizdiń qoldaýymyzben shyǵyp, el táýelsizdigin nyǵaıtý jolynda halyq sózin sóıledi  desek, shyndyqtan attamaımyz. «Nur Otan» partıasy aıqyndaǵan maqsattar men mindetter meniń de qyzmet barysyndaǵy baǵdarlamaǵa aınaldy.

Keıingi jyldary da Aqtóbe óńirine is-saparlary kezinde Elbasymen áldeneshe júzdesip, tildesý sáti túsken bolatyn. Osyndaı kúnderdiń birinde men Úlken Adamǵa onyń Temirtaýdaǵy jastyq jalyndy kúnderinde bir bólmede jatyp eńbektes bolǵan, qara nandy qaq bólip, jastyq shaǵyn birge ótkizgen Temirbolat Qubashev meniń bokstan bapker ustazym ekenin, al ózim ulttyq at sportyn óńirimizde barynsha damytýǵa úlesimdi qosyp kele jatqanymdy jetkizdim. Elbasymyz meni muqıat tyńdap, oń qabaq tanytty. Sebebi ol da atqumar, qazaqy minezdi jan eken, janary jaınap qoıa berdi, óziniń jaqsy kóretin kók jorǵasy bar ekenin de jasyrǵan joq. Sóıtip ol meniń bul isti toqtatpaı, jalǵastyra berýim kerektigin de eskertti. Jalpy Elbasy qandaı da bir syılyqtan bas tartsa da, qazaqqa qasıetti jylqy malyn syıǵa usynǵanda qarsylyq bildirmeıdi eken. Bul iske óte mańyzdy yqylas qoıyp, ózi de jylqyny baptap-ósiretin oryn saldyrǵan.

          Nursultan Ábishulynyń jylqy malyna degen kózqarasy, atbegiligi bólek áńgime. Prezıdenttiń er ústinde qazyqtaı qadalyp otyrǵanyna súısinip, bala kúninen at jalynda oınap ósken shopan ulyna tán qasıeti mol eken dep tujyrymdadym ishimnen.

          Nursultan Ábishulynyń  sáıgúlikti  bir qaraǵannan baıqaıtyn, mal tanıtyn qasıeti de bar eken. Muny kelesi bir kezdesý – 2001 jyldyń 2 maýsymynda baıqadyq. Elbasynyń osy bir atqumarlyq qazaqı qalpyn baıqaǵan biz oǵan 2000 jyly salynyp bitken ıpodromda Aqtóbe sáıgúlikterimen tanystyrýdy usynyp edik, ýaqytynyń tarlyǵyna qaramastan Prezıdent az da bolsa bul is-sharaǵa óziniń altyn ýaqytyn bóldi.

Ýaqyttyń tyǵyzdyǵyna baılanysty Elbasy ıpodromǵa soqpaýy da múmkin, - degen boljamǵa atbegiler sengen joq. «Júırik attyń jolynda janyn beretin qazaqtyń balasy tulpar tuıaǵynyń dúbirin estip turyp moıyn burmaýy múmkin emes, qalaı da ýaqyt tabady» degen-di olar.

          Seıisterdiń senimi aldaǵan joq. Eset batyr atyndaǵy polısıa mektebinen shyqqan Prezıdenttiń kóligi ıpodromǵa tumsyq tiredi. Shıraq qımyldap, trıbýnaǵa kóterilgen ol «qazir ushqyr attar jarysy bolady» deı bergende, «áı, mynaý taıpalǵan jorǵa ǵoı» dedi alańda sar jelip bara jatqan top attyń ishinen bir sáıgúlikti nusqap, - átteń, biraq uzaq shabysqa shydamaıdy eken, - dedi.

          Qyraǵy kózdiń qapy ketpegenin keıin atbegiler de moıyndady.

          Ipodrom qazir tek qana jarys alańy emes, attardy baptaıtyn da oryn. Prezıdenttiń kelý saltanatyna 70 at ázirlenipti. Olardyń qatarynda Eset batyr atyndaǵy áskerı-polısıa mektebiniń, Qandaǵash qalasynyń «Vladımır» JSHS-niń, Alǵa aýdany, Eset ata áýlıe atyndaǵy ÓK-niń, Hromtaý aýdanynyń «Aınur» sharýa qojalyǵynyń, Qarǵaly aýdany «Tabıǵat» JSHS-niń, Aqtóbe qalasynyń «Nurdáýlet» JSHS-niń attary bar.

          5 mınýt shamasyndaǵy ýaqytta uıymdastyrýshylar jelis jáne ushqyr attar jarysyn kórsetip qana úlgerdi. Sońǵysynda «Vladımır» JSHS-niń «Faızı» atty sáıgúligine mingen Násenov Nurhan esimdi bozbala «aqtańgerlep» uran salyp máre syzyǵyn kesip óte bergende Elbasy da ornynan tura ketti.

          Qazaq pen jylqy egiz uǵym degen ras eken ǵoı.

          Ipodromdy kórip, rızashylyǵyn bildirgen Elbasy at sportyn ári qaraı damytý jóninde maǵan tapsyrmalar berip jatty.

          2008 jyldyń 22 qyrkúıeginde Aqtóbede Qazaqstan men Reseı shekaralas aımaqtarynyń V forýmy bolyp ótkeni belgili. Oǵan Reseı Prezıdenti D.Medvedev bastaǵan kórshiles eldiń bir top gýbernatorlary da qatysqan bolatyn. Oblys basshylyǵynyń syıly qonaqqa at mingizip, shapan jabý ata salty ǵoı, D.Medvedevke  asyl tuqymdy arǵymaq tartý eteıik dep sheship, osy sharýany maǵan júktedi. Osylaısha, kóptiń kómegimen sonaý Vengrıadan bir aýqatty jannyń at saraıynan genefondy (ata tegi) jyldar boıy jazylyp kele jatqan arab arǵymaǵyn aldyrýǵa qolymyz jetti. Bul endi uly Abaı «Attyń synynda» aıtqan:

          Shoqpardaı kekili bar, qamys qulaq,

          Qoı moıyndy, qoıan jaq, bóken qabaq.

          Aýyz omyrtqa shyǵyńqy, maıda jaldy,

          Oı jelke, úńireıgen bolsa saǵaq

sózderiniń ıesi bola alatyn, sulýlyǵyna kóz toımaıtyn, asyldyń asyly edi. Endi osy «arabymyz» Prezıdent D.Medvedevke tabys etý sátinde minez kórsetip, asaýlyǵyn eske alǵany...

          Sol kezde Nursultan Ábishuly «asaýǵa» jaqyndap, oqys únmen bir jekirgeni bar. Belgili bir qasıeti bar adam qandaı da bolsa, asaýdyń mysyn basady degenge osy joly kózimiz jetti, arǵymaq jas baladaı jýası qaldy. Elbasy ony erkeletip kekilinen, jalynan, ıilgen moıynynan sıpap ózine sendirip aldy da, tizgininen ustap D.Medvedevke jaqyndap, oǵan tabys etti.

- Vot eto krasaves! – dep súısindi.  Rızashylyq tanytqan D.Medvedev degenmen bizdiń Elbasyndaı jylqynyń kekilinen sıpaı qoıǵan joq...

          Kezinde Elbasynyń birneshe ınaýgýrasıasyna qatysý baqytyna ıe boldyq, bıylǵy maýsymdaǵy Prezıdent ınaýgýrasıasyna da qatystym, - dep aıaqtady áńgimesin Baǵlan Baımaǵambetov.

Balnıaz Ajnıazov, Qazaqstan jýrnalıser Odaǵynyń múshesi