Esterińizge sala ketsek, Sholpan Atada ótken dúnıejúzilik kóshpendiler oıynynda qazaq-ózbek kókparshylarynyń kezdesýi úlken daý týdyrǵan bolatyn. Jartylaı fınalda elimizdiń shabandozdary ala shapandylarǵa ese jiberip, qyrǵyzdardyń synyna ushyraǵan. Qyrǵyzstan Respýblıkasynyń Osh oblysynda jıý-jıtsý (ne-vaza) boıynsha ótken halyqaralyq týrnır «Alau open-de» elimizdiń palýandary ese qaıtaryp, qazaq sportshylarynyń myqty ekenin kezekti ret dáleldedi.

Atalǵan týrnırge "Sagadat batyr QTT" sport klýbynan 7 men 17 jas aralyǵynda 23, al eresekterden 4 sportshy Qazaqstan namysyn qorǵap barǵan bolatyn.

Erekshe atap ótetin sportshynyń biri – 11 jastaǵy Jibek Qulymbetova.

Talaı sportshynyń jaýyrynyn jer ıisketken sportshy qyzdyń qorjynynda – «Álem chempıony», Halyqaralyq týrnırlerdiń jeńimpazy tıtýly bar.  Bul saıysta qyrǵyz, ózbek, tájik sportshylaryn tize búktirip, altyn alqa qanjyǵalady. Osy týrnırde Jibek Qulymbetova qyrǵyz, ózbek, tájik sportshylaryn utyp qana qoıǵan joq, ul balalar arasynda chempıon atanǵan qyz boldy.

84 kelige deıingi salmaqta jeńiske jetken Nursultan Orynbasarov atalmysh klýbtyń bapkeri. Nursultan ártúrli sebepke baılanysta sporttan birshama ýaqyt qol úzip qalǵan bolatyn. Óziniń týǵan kúninde ózine syılyq jasaǵan sportsmen sportqa qaıta oralǵanyn málimdedi.

Sondaı-aq, "Sagadat batyr QTT" klýbynyń bapkeri Samat Aıtpanbet el abyroıyn asqaqtatyp, komanda qorjynyna altynnan alqa qosty.

Nursultan Orynbasarov jetekshilik etetin "Sagadat batyr - QTT" sport klýbynyń qorjynynda jalpy 25 medal bar: onyń 15 altyn, 5  kúmis, 5 qola medal.