Almaty ákimi «Saıran» ózeniniń aınalasyn abattandyrýdy odan ári jalǵastyrýdy tapsyrdy.
Jumys sapary kezinde Almaty ákimi Baýyrjan Baıbek «Saıran» ózeniniń aınalasyn aralap kórdi jáne keler jyly da abattandyrý jumystaryn odan ári jalǵastyrýdy tapsyrdy.
Bıylǵy jyly sý qoımasynyń batys bóliginiń betkeıleri retteldi, satyly túsý joly jóndeldi, 7 ga jer gazondaldy. Bulardan ózge, jaryq kózderi ornatyldy, asfált tóselip, balalar jáne sport alańdary kóriktendirildi.
Osyǵan uqsas jumystar shyǵys bólikte de atqaryldy, kóshe jıhazy qoıylyp, jańadan 130 jaryq baǵanalary ornatyldy,vorkaýt- alań men jaǵalaý voleıbolynyń alańy kóriktendirildi. Júgirý men velosıped tebýge arnalǵan 5 shaqyrym jol jasaldy.
Óz kezeginde megapolıs ákimi keler jyly da ózen mańyn abattandyrý jumystaryn jalǵastyrýdy, al aýdan ákimdikterine ózenge jaqyn aýmaqtardy kóriktendirý, sport jáne balalar alańdarynyń sanyn kóbeıtýdi tapsyrdy.
Aıta keterligi, jalpy Almatyda bıylǵy jyly 524 kóshe jóndeldi, 1400 eski aýla jańardy. 300 shaqyrym aryq salyndy jáne jóndeldi, 800 shaqyrym ınjenerlik jeli tartyldy.
Qalanyń barlyq jer asty ótpeli joldary jańardy. Jyl aıaǵyna deıin barlyq kóshe jaryqtarynyń úshten biri jaryq dıodty jáne energıa jınaqtaýshy shamdarǵa aýystyrylady.
