Kezdesýde taraptar eki jaqty yqpaldastyq jáne saýda-ekonomıkalyq qatynastardy odan ári damytý máselelerin talqylady dep habarlaıdy Qamshy.kz aqparat agenttigi Aqordanyń baspasóz qyzmetine silteme jasaı otyryp.
Nursultan Nazarbaev Qazaqstan men Armenıa arasyndaǵy yntymaqtastyqtyń joǵary deńgeıde ilgerilep kele jatqanyna toqtalyp, ony keńeıtýdiń áleýeti jetkilikti ekenin atap ótti.
– Qazaqstan Armenıamen árdaıym jaqsy qarym-qatynasta boldy. Elderimiz arasyndaǵy saýda aınalymy byltyr 60 paıyzǵa jýyq ósti. Bul úrdis qazir de jalǵasyn taýyp otyr. Munymen shektelmeıtinimizdi atap ótkim keledi. Úkimetterimiz eki jaqty baılanystardy nyǵaıtý úshin kúsh jumyldyrýy kerek. Bizdiń kompanıalarymyz eki eldiń de ekonomıkasyna ınvestısıa quıa alady, – dedi Qazaqstan Prezıdenti.
Memleket basshysy eńbek mıgrasıasy máselelerine jáne eki el kásipkerleri arasyndaǵy baılanystardy keńeıtý qajettigine toqtalyp, ol úshin tıimdi jaǵdaı jasalǵanyn atap ótti.
N.Pashınán Nursultan Nazarbaevqa kezdesýge jáne memleketaralyq baılanystardy odan ári nyǵaıtý isindegi mańyzdy máselelerdi talqylaýǵa múmkindik týǵyzǵany úshin rızashylyq bildirdi.
– Ózara yqpaldastyǵymyz oń qarqyn alyp otyrǵanymen erekshelenedi. Onyń odan ári osylaı ilgerileı beretinine senimdimin. Biz úshin Qazaqstanmen aradaǵy baılanys óte mańyzdy. Ekonomıka sektoryndaǵy qatynastardy, sonyń ishinde ınvestısıalyq yntymaqtastyqty damyta túsemiz dep úmittenemiz, – dedi Armenıa Premer-Mınıstri.
Sonymen qatar, N.Pashınán Qazaqstan men Armenıa arasyndaǵy yntymaqtastyqty halyqaralyq uıymdar aıasynda nyǵaıtýdyń mańyzdy ekenin atap ótti.
