Reseı 5 birdeı qazaqstandyq kompanıanyń ónimderin sanıtarlyq talapqa saı emes dep shara qoldanyp jatyr. Kórshi eldegilerdiń aıtýynsha, bizdiń elden eksporttalǵan qus eti men balyq, shujyq jáne et konservileriniń quramynda veterınarlyq-sanıtarlyq talaptar óreskel buzylǵan dep habarlaıdy Qamshy.kz aqparat agenttigi KTK telearnasynyń aqparatyn negizge alyp.
Reseı veterınarlyq jáne fıtosanıtarıalyq baqylaý qyzmetiniń málimdeýinshe, álgi ónimder Reseı men Eýrazıa ekonomıkalyq odaǵynyń sanıtarlyq talaptaryna saı kelmeıdi. Óıtkeni bir kompanıanyń konservlengen maıshabaqtarynan densaýlyqqa asa qaýipti benzapıren kómirtegi ekinshi ret anyqtalypty. Endi oǵan 29-shy qyrkúıekten bastap Reseıge ónimin tasymaldaýǵa ýaqytsha shekteý qoıylǵan. Ónimderi sapasyz dep tanylǵan qalǵan 4 kompanıanyń taýarlaryna qatysty zerthanalyq baqylaý kúsheıtilipti. Ekinshi ret kemshiligimen kózge tússe, olardy da osyndaı jaza kútip tur. Reseı onsyz da bizdiń mal sharýashylyǵy ónimderimizge qarashadan bastap shekteý qoımaq. Onyń sebebi, Qazaqstan tarapy tasymal merzimderin durys saqtamaıdy eken.
