Elbasy 5 qazanda Aqorda rezıdensıasynda halyqqa Joldaýyn jarıalady. Joldaýyn jarıalamas buryn Qazaqstannyń búgingi kúnge deıingi jetistikterin tizip, aldaǵy josparlardy atady.

Elbasy Joldaýyn ulttyq telearnalar men Aqordanyń Feısbýktegi resmı paraqshasy tikeleı efırde kórsetip jatyr.

Joldaýynda Elbasy adam quqyqtaryna erekshe toqtalyp ótti. Birinshi kezekte adam densaýlyǵyn birinshi orynǵa qoıý kerek ekenin basa aıtty. Ol úshin turǵyndardyń jaıly ómir súrýine múmkindik jasaýdy tapsyrdy. Muny aıtqan Nazarbaev Almaty qalasynyń ákimi Baýyrjan Baıbekti maqtady.

«Sapaly ómir súrý degenimiz jaıly páterde turý degen sóz. Jumysyna da jaqyn, úıiniń sapasy da joǵary, aýlasy da jaıly. Bul jaǵynan Almatynyń ákimi Baýyrjan Baıbekke qoshemet kórsetip qoısańyzdar bolady. Astana da dál solaı», - degen Nazarbaev «Áıteýir men júrgen jerler taza» dep zaldy bir kúldirip aldy.

Degenmen Elbasy kez kelgen ýaqytta kez kelgen buryshqa óte salatynyn eskertti.

Elbasynyń 2017 jylǵy «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýynda el ekonomıkasyn órkendetip qana qoımaı, bilimdi damytý, rýhanıatymyzdy jańǵyrtý, qaýipsizdik sharalaryn kúsheıtý, dinı ekstremızmniń aldyn alý, qylmystyq jazany ótep jatqan azamattardy teologıalyq turǵydan saýattandyrý máseleleri aıtyldy.

Memleket basshysy óskeleń urpaqty óz betimen izdenýge úndep, osy baǵytta oqytý baǵdarlamalaryn jetildirýdi tapsyrdy. Sonymen qatar, IT-bilimdi, qarjylyq saýattylyqty, ultjandylyqty damytýǵa basa kóńil bólý qajettigin sóz etti.

Al 2018 jyly 10 qańtarda «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýyn jarıalady. Onda Tórtinshi ónerkásiptik revolúsıa álemine beıimdelý men jetistikke jetý jolyn tabý úshin ne isteý qajettigin aıqyndady.  úsh tildi meńgergen kez kelgen etnıkalyq toptyń ókili Prezıdent bola alatyny aıtyldy. 2018 jyly zeınetaqy men járdemaqynyń jáne muǵalimder jalaqysynyń neshe paıyzǵa ósetinin habarlady.