Memleket basshysy Qazaqstan halqyna arnalǵan jyl saıynǵy Joldaýyn jarıalady, dep habarlaıdy Qamshy.kz aqparat agenttigi.
Nursultan Nazarbaev Joldaýynda Qazaqstan polıseıleri týraly da aıtyp ótti.
«Halyq quqyq qorǵaý organdary, onyń ishinde eń aldymen polısıa jumysy túbegeıli jaqsartýyn kútip otyr. Quqyq qorǵaý organdaryn jańartý kerek», - dedi Nazarbaev.
Elbasy buǵan deıin de talaı ret Qazaqstan polıseıleriniń jumysyn synaǵan bolatyn.
«Álemde polıseıler – kóshede ketip bara jatqan azamattyń, adamnyń dosy bolyp esepteledi. Al bizde kim?», - degen edi Nazarbaev.
Elbasy polıseılerdiń barlyǵyn jumystan shyǵaryp ornyna zańgerlerdi alǵan Grýzıany mysalǵa keltirdi. Qazaqstanda da mundaı shara qoldanylýy múmkin ekenin jasyrmady.
Prezıdent kóp jyldan beri quqyq qorǵaý júıesiniń jumysyna serpin kerek ekenin aıtyp, ony halyqtyń polıseılerge degen senimi joqtyǵymen túsindirip keledi.
Qazaqstandyqtardyń polıseılerdiń jumysyna kóńili tolmaıtyndyǵy sportshy Denıs Tendi Almatynyń ortalyǵynda, tapa-tal túste pyshaqtap óltirip ketkende aıryqsha sezildi.
Sportshynyń ólimi halyq shydamynyń shegi boldy. Qazaqstandyqtar İshki ister mınıstri Qalmuhanbet Qasymovtyń otstavkasyn talap etken edi.
Elimizde mundaı jaǵdaılardyń oryn alýy men halyqtyń kóp jyldan beri polıseılerge senimsizdik tanytatyny QR İİM jumysynyń osaldyǵy ekeni jasyryn emes.
«Quqyq qorǵaý organdary men sot júıesindegi qyzmetkerlerge qatal talap qoıý kerek. Olardyń jumysy, moraldy-etıkalyq qalyby keremet bolýy shart», - degen edi.
Osydan eki jyl buryn Nursultan Nazarbaev halyqtyń polıseılerge degen kózqarasy ózgerýi kerek ekenin aıtyp ótken. Olardyń qyzmeti eń aldymen halyqqa kómektesýge baǵyttalýy kerek ekenin aıtty. Alaıda eki jyldan beri halyqtyń quqyq qorǵaý organdaryna degen senim azaımasa, artpady. Iaǵnı eki jyldan beri nátıje joq.
QR Prezıdenti búgingi halyqqa Joldaýynda quqyq qorǵaý organdarynyń jumysyn ádettegideı synap ótkenin eskersek, İshki ister mınıstri ornyn bosatýy ábden múmkin.
