"Elbasy ne deıdi?" dep kútip otyrǵan qazaq qanshama. Nazarbaevtyń aýzynan shyqqan árbir sózden jaqsylyqtyń nyshanyn izdep otyrǵan kópshiliktiń úmitin Elbasy aqtady. "7-20-25"  baǵdarlamasynyń nege júzege aspaı jatqanyna alańdaǵan Nazarbaev Danıar Aqyshev pen Asqar Mámındi tik turǵyzdy. "Qazaqstandyqtar osy baǵdarlamaǵa qyzyǵýshylyq nege bildirmeı jatyr?" degen ekeýin de ábigerge salǵandaı boldy. Aqyshevtiń aıtýynsha, 2000 adam "7-20-25-tiń" ıgiligin kórip úlgerdi, baspanaly boldy. Alaıda bul sanǵa Elbasynyń kóńili tolmady. "50 sharshy metrlik bir bólmeli páterdiń quny qansha?" degen kezekti suraqqa Mámın "7 mıllıon teńge" dep jaýap berdi. Zalda áldekimniń 3 mıllıon degeni estildi. "7 mıllıon" degendi estip, ımandaı sengen Nazarbaev "1 mıllıon 300 myń teńgesi joq pa qazaqstandyqtardyń?" dep nalyǵany daýsynan bilindi. Osy kezekte, 50 sharshy metrlik bir bólmeli páterlerdiń quny qansha ekendigine toqtalsaq. Astanadaǵy baǵalardy bilý úshin ǵalamtordyń kómegine júgindik, al Almatydaǵy turǵyn úı keshenderiniń satý bóliminiń menedjerlerimen tildesýge týra keldi. 

Astananyń Esil aýdanynan 42-53 sharshy metrlik bir bólmeni 14 000 000 - 21 000 000 teńge aralyǵynda ala alasyz (Krisha.kz saıtyndaǵy izdeý júıesiniń bergen sıfrasy osyndaı)

Almatydaǵy "Abaıdyń boıyndaǵy úı" turǵyn úı keshenindegi bir bólmeli páterler 55 sharshy metrden bastalady eken. Quny 24 750 000 teńge. Bul eń tómengi baǵasy.

"Akvarel" turǵyn úı kesheninde 1 bólmeli páterler 37.9 sharshy metr eken. Baǵasy 14 278 000 teńge.

58.8 sharshy metrlik eki bólmeli páterler de bar. Quny 20 894 000 teńge. 

"Almaly turǵyn úı kesheninde 33.7 sharshy metrden quralǵan bir bólmeli páterdi satyp alý úshin 8 725 000 teńge beresiz. 53.5 sharshy metrlik eki bólmeniń quny 13 696 000 teńge.

Bir aıta keterligi, turǵyn úıler birneshe klasqa bólinedi eken: 1, 2, 3, 4 klass.

1 klass-premıým. Baǵalary ýdaı.

2 klass - bıznes. Aty aıtyp tur.

3 klass-komfort.  Mysaly, komfortty baǵalar 14 278 000-nan bastalady.

4 klass-ekonom. Mysaly, ekonomdy baǵalar 13 696 000-ǵa teń. 

Asqar Mámın aıtqan 7 mıllıon teńgege, ókinishke qaraı, 50 sharshy metrlik bir bólmeli páterdi eki qaladan da tappadyq. Árıne, Qostanaı sıaqty kishigirim qalalardan tabýǵa bolady. Biraq áńgime Astana men Almaty tóńireginde bolǵan sıaqty.