Nursultan Nazarbaev memlekettik qyzmetshilerdiń jumys tártibin sóz etti. Aıtýynsha, sheneýnikterdiń kúni tek otyrýmen ótedi.

«Sońǵy kúnderi parlamentte uzaq otyrystar men jınalystar jıilep ketti. Bir jyldyń 100 táýliginde jınalys ótedi. Jumys isteý múmkin emes. Men jarlyqqa qol qoıdym ǵoı – úkimetke seısenbide ǵana barý kerek. Biraq barmaısyńdar. Tańnan beri – otyrystar, tústen keıin – kezdesýler. Dúısenbi men qabyldaımyn. Beısenbi – Parlamenttegi esepter. Kelisip alaıyq. Ne mınıstrler, ne ákimder nemese olardyń orynbasarlary Aqordada júredi», - dedi prezıdent.

Onyń ústine, jınalystardy tek jarty saǵatqa laıyqtaýǵa bolatynyn eskertti.

«Memlekettik jumysta tájirıbem mol, jınalystardy jarty saǵatta ótkizýge bolady. Qıyn máselelerdi ǵana bir saǵatqa sozý kerek. Memlekettik qyzmetshi zań boıynsha on eki saǵatqa deıin otyrmaı jeti saǵat qana jumys isteý kerek. Bir kúnde jeti ret jınalys ótkizesińder. Baqytjan, (Saǵyntaev – premer-mınıstr)  aıtshy, sen sonda qashan jumys isteısiń? Sol úshin de elde ne bolyp jatqanyn baqylaı almaı otyrsyńdar ma? Men ornatqan tártipti júzege asyryńdar! Adamdarǵa jumys istetińder», - dep ashýlandy Elbasy.

Aıta keteıik, Elbasy 5 qazanda Aqorda rezıdensıasynda halyqqa Joldaýyn jarıalady. Joldaýyn jarıalamas buryn Qazaqstannyń búgingi kúnge deıingi jetistikterin tizip, aldaǵy josparlardy atady.

Elbasy Joldaýyn ulttyq telearnalar men Aqordanyń Feısbýktegi resmı paraqshasy tikeleı efırde kórsetti.