Qazaqstanda Ujymdyq qaýipsizdik týraly shart uıymy barlaý bólimsheleriniń kúshteri jáne quraldarymen «İzdestirý-2018» birlesken taktıkalyq arnaıy oqý-jattyǵýy ótýde.

Taktıkalyq oqý-jattyǵý aıasynda UQSHU-ǵa múshe memleketterdiń barlaý bólimsheleri barlaýdy júrgizý boıynsha jaýyngerlik is-qımyldardy oryndaýǵa kiristi. Almaty oblysyndǵy Qapshaǵaı sý qoımasynda áskerı júzgishter jaýdyń qarsy kúshine qalaı toıtarys berip, olardyń kózin qalaı joıatynyn kórsetip, sheberlikterimen bólisti.

Oqý-jattyǵý kezinde jeke ujym «barlaýshylar» jáne «terrorıster» bolyp eki komandaǵa bólingen. Barlaýshylardyń eki toby qaıyqtan sýǵa súńgip, belgili tereńdikte jaǵaǵa deıin 50 metr qashyqtyqtan júzip kelip, «terrorısterge» shabýyl jasady. Jaǵaǵa shyqqan boıda avtomattar men tútin bombalaryn paıdalanyp, «terrorısterdiń» kózin joıdy.

«Jattyǵý barysynda bizge zańsyz qarýly toptardy anyqtap, olardyń kózin joıý tapsyryldy. Osy oraıda, áskerılerdi joǵary jyldamdyqty qaıyqtarda belgili orynǵa jetkizý, kópirshik shyǵarmaıtyn tuıyqtalǵan apparattardy qoldaný arqyly sý astynda barlaýshylardyń qozǵalysy, sondaı-aq zańsyz qarýlanǵan lańkesterdi quryqtap, olardyń kózin joıý jáne barlaýshylar tobyn evakýasıalaý máseleleri qarastyryldy.

Bizge artylǵan mindetter tolyǵymen oryndaldy», - dep atap ótti №35950 áskerı bóliminiń basshysy, maıor Erkebulan Kýzenov.

Iá, áskerı júzgishterdiń jumysy ońaı emes. Mundaı salada qyzmet atqarý úshin densaýlyǵyń jaqsy bolǵany jetkiliksiz, psıhologıalyq turǵydan da óte myqty bolyp, kez kelgen sıtýasıaǵa daıyn bolyp, túrli oqys oqıǵalarǵa salqynqandylyq tanyta bilý kerek.

Áskerı júzgishterdiń qataryna qosylý úshin kýrsanttar mindetti túrde kóptegen synaqtardan ótip, qajetti erejelerdi qabyldaıdy, sonymen qatar, olar psıhologıalyq jáne arnaıy tekseristen ótýleri tıis. Buǵan qosa, áskerı júzgishter kez kelgen jaǵdaıda óz betimen durys sheshim qabyldaı alýy tıis. Oqys oqıǵa kezinde joǵarydan buıryqty kútip otyrýǵa ýaqyt jetpeı, jyldam áreket etýi kerek bolǵan jaǵdaıda sıtýasıadan shyǵý joldaryn óz betimen qarastyra alýy kerek.

«Óz isine úlken jaýapkershilikpen qarap, bul mamandyqty súıip istemegen adam jetistikterge jete almaıdy jáne bul salada uzaqqa deıin barmaıdy. Meniń oıymsha, áskerı kúshterdiń qatarynda qyzmet etý úshin, eń aldymen, óz elińniń patrıoty bolýyń kerek. Al, aqsha úshin áskerı salada júrgen adamǵa senim arta almaısyń, ondaı adam kez kelgen ýaqytta seni satyp ketýi ábden múmkin.

Áskerı júzgishterdiń qatarynda bolýdy bala kezimnen armandaǵan joqpyn, alǵashynda qurlyq áskerleriniń qatarynda qyzmet ettim. Keıinnen bul qyzmetke kelgennen keıin, ózimniń mamandyǵymdy jaqsy kórip kettim», - deıdi serjant Oljas Qasymov.

Onyń aıtýynsha, áskerı adam óte aqyldy bolýy tıis. Udaıy ózińdi damytý, shet tilderin meńgerý – birinshi sanattaǵy jaýyngerdiń negizgi belgileri.

Oqý-jattyǵýda qoıylǵan negizgi mindetterdi aıaqtaǵannan keıin tilshilerge de áskerı júzgishtermen birge sýǵa súńgýge múmkindik berildi. Alaıda mundaı qadamǵa barýǵa barlyq tilshiniń batyly jetpedi. Biri sýdan qoryqsa, biri kúnniń salqyndyǵynan qoryqty. Degenmen áskerı júzgishtermen birge sýǵa túsip kórgennen keıin-aq olardyń jumysynyń qanshalyqty aýyr ári qaýipti ekenin túsingendeımiz.