«Nur Otan» partıasy Tóraǵasynyń Birinshi orynbasary Máýlen Áshimbaev Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna qoldaý bildirý maqsatynda Demokratıalyq kúshterdiń «Qazaqstan-2050» jalpyulttyq koalısıasynyń kezekti otyrysyn ótkizdi. Onda 6,5 mıllıon qazaqstandyqtyń múddesin bildiretin Koalısıa músheleri Joldaýda kórsetilgen basymdyqtardyń mańyzyna toqtalyp, jańa strategıalyq qujatty iske asyrýdyń naqty tetikterin aıqyndady.

Otyrysty ashqan «Nur Otan» partıasy Tóraǵasynyń Birinshi orynbasary elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan bıylǵy Joldaý Elbasy saıasatynyń beriktigi men turaqtylyǵyn kórsetetinin aıtty.

– Elbasynyń Joldaýynda qoǵamda qyzý talqylanyp júrgen eń ózekti áleýmettik máseleler qamtylǵan. Memleket basshysy sol máselelerdi sheshý úshin naqty sharalardy usynyp otyr. Atap aıtqanda, halyqtyń ál-aýqatyn arttyrý, turmys-jaǵdaıyn jaqsartý, baspanaǵa qoljetimdilikti qamtamasyz etý, turǵyn úı-kommýnaldyq sharýashylyqtaǵy qordalanǵan máselelerdi sheshý, tarıfterdi shekteý jáne joldardy jóndeý, qoǵamdyq qaýipsizdik sekildi máseleler kóterilgenin bilemiz, – dedi Máýlen Áshimbaev.

Sonymen qatar «Nur Otan» partıasy Tóraǵasynyń Birinshi orynbasary atalǵan máselelerdi sheshýge baǵyttalǵan Elbasy usynystaryn júıeli sıpatqa ıe ekenin aıtty.

– Eń tómengi jalaqyny bir jarym esege kóbeıtý mıllıondaǵan qazaqstandyqtyń turmys deńgeıine oń áserin tıgizetin shara. Sonymen birge, densaýlyq saqtaý men bilim berý salasyna bólinetin qarajat ta kóbeıetin bolady. Bul sharalardyń bári júıeli túrde Qazaqstandaǵy áleýmettik jaǵdaıdy odan ári damytýǵa tyń serpin beretini sózsiz, – dedi Máýlen Áshimbaev.

Sondaı-aq jıyn barysynda Elbasy aıqyndap bergen áleýmettik jańǵyrýdyń negizgi basymdyqtary Qazaqstandy ómir súrý deńgeıi jaǵynan álemdegi eń damyǵan elderdiń qataryna qosatyn negizgi tetik ekeni aıtyldy. Osyǵan oraı «Nur Otan» partıasy naqty baǵyttar boıynsha júıeli túrde jumys júrgizbek.

– Birinshiden, barlyq saıası partıalar jáne qoǵamdyq kúshter men memlekettik emes uıymdar birigip, Elbasy usynystarynyń máni men mańyzyn halyqqa túsindirýge atsalysýy kerek. Ekinshiden, atalǵan uıymdar Joldaý basymdyqtaryn júzege asyrýdyń tıimdi tetikterin talqylap, ony Úkimetpen birlesip atqarýǵa úles qosýdy kózdep otyr. Úshinshiden, «Nur Otan» basqa da saıası partıalarmen jáne memlekettik emes uıymdarmen kúsh biriktirip Joldaýdyń júzege asyrylýyna júıeli túrde qoǵamdyq baqylaý júrgizýdi qolǵa alady, – dedi Máýlen Áshimbaev.

Odan bólek, «Nur Otan» partıasy Tóraǵasynyń Birinshi orynbasary Memleket basshysynyń usynystaryn barlyq negizgi saıası partıalar men qoǵamdyq kúshter qoldap otyrǵanyn, oǵan demokratıalyq kúshterdiń jalpyulttyq koalısıasynyń jınalysy dálel ekenin tilge tıek etti.

Otyrysqa eldegi jetekshi partıalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysty. Jıyn barysynda Koalısıa músheleri Memleket basshysynyń jańa Joldaýyna baılanysty óz oılaryn ortaǵa salyp, pikirlerimen bólisti. Atap aıtqanda, «Aq jol» demokratıalyq partıasynyń tóraǵasy, Májilis depýtaty Azat Perýashev, Qazaqstan komýnıstik halyq partıasynyń hatshysy, Májilis depýtaty Jambyl Ahmetbekov, Prezıdenttiń bes áleýmettik bastamasynyń júzege asyrylýyn baqylaý jónindegi qoǵamdyq keńestiń tóraǵasy, Parlament Senatynyń depýtaty Baqytjan Jumaǵulov, «Atameken» ulttyq kásipkerler palatasynyń Basqarma tóraǵasy Abylaı Myrzahmetov, Qazaqstan Respýblıkasy Kásipodaqtar federasıasynyń tóraǵasy Baqytjan Ábdiraıym, Qazaqstan azamattyq alánsynyń prezıdenti Asylbek Qojahmetov, «Qazaqstan Respýblıkasy Prezıdentiniń «Bolashaq» halyqaralyq stıpendıasy stıpendıattarynyń qaýymdastyǵy» Keńesiniń tóraǵasy, Májilis depýtaty Baqtıar Máken jáne «Qazaqstan-2050» jalpyulttyq qozǵalysy keńesiniń tóraǵasy Muhtar Mankeev sóz alyp, Joldaýda kórsetilgen bastamalar halyqtyń turmys deńgeıin jańa deńgeıge kóteretinin aıtty.

İs-shara sońynda Joldaýǵa qoldaý bildirgen, elimizdiń barsha azamattaryn jyldyń basty qujatyn talqylaý, túsindirý jáne iske asyrýjumystaryna belsendi qatysýǵa shaqyrǵan Úndeý qabyldandy.

Anyqtama úshin: Demokratıalyq kúshterdiń «Qazaqstan-2050» jalpyulttyq koalısıasy «Nur Otan» partıasynyń bastamasymen quryldy. Ol 5 saıası partıanyń jáne 24 iri qoǵamdyq birlestiktiń basyn biriktirip, 6,5 mln. qazaqstandyqtyń múddesin qorǵaıdy. Sondaı-aq, Koalısıa elimizde bolǵan kez kelgen saıası oqıǵa men strategıalyq mańyzy bar bastamalarǵa qatysty birden óz pikirin bildirip, ártúrli usynystaryn joldap otyrady.