Aqtóbe turǵyny úkim shyqqannan keıin, ózin jappaı zorlady degen burynǵy shaǵymynan bas tartty dep jazady Qamshy.kz aqparat agenttigi sputniknews.kz saıtynyń deregin negizge alyp. Jala japqany úshin áıel adam on jylǵa deıin sottalýy múmkin.

Oqıǵa byltyr tamyz aıynda bolǵan. Bastapqy shaǵymyna sáıkes, áıel adam tanysy jáne onyń dostarymen birge tabıǵat aıasyna demalýǵa baryp, bári ishimdik ishedi. Birazdan soń dostarynyń biri áıelge jynystyq qatynasqa túsýge usynys aıtady, ol bastartqan soń uryp-soǵyp zorlaǵan, artynsha ekinshi tanysy da jabylady. Al áıeldiń óziniń dosy oqıǵanyń bárin vıdeoǵa túsiripti. Biraz ýaqyttan soń áıel adam azaptaýshylardan qutylyp, polısıaǵa aryz bergen.

Bir aıdan keıin ekinshi synypta oqıtyn balasy bar, 28 jastaǵy áıel aldyńǵy aıtqan sózderin qaıtyp alyp, eski tanysynyń zorlaý isine qatysy joq ekenin alǵa tartyp, al eki erkekpen jynystyq qatynasqa túsýge ózi keliskenin málimdedi. Oqıǵanyń jańa nusqasyn sotta aıtyp berse de, ekinshi qalalyq sot onyń túsiniktemesine syn kózben qarap, aıǵaqtarǵa sáıkes kelmeıtinin anyqtady.

Sot onyń tergeý kezinde bergen birinshi aryzyn shyndyqqa janasady dep tanydy.

Sottyń sheshimimen úsh er adam alty jyldan segiz jylǵa deıin bas bostandyqtarynan aıyryldy. Úkim zańdy kúshine enip, Joǵary sot ta ony ózgerissiz qaldyrdy.

Al jas áıel prokýratýra, ulttyq qaýipsizdik komıteti jáne ishki ister departamentine hat jazyp, quqyq qorǵaý organdaryn jynystyq qatynasqa óz erkimen túskendigine sendirýge tyrysty, ózin soqqyǵa jyqqan jigitke ǵana shaǵymy bar eken.

28 qyrkúıekte áıel adam osy iske qatysty Jaqyp Asanovqa vıdeoúndeý joldap, tilshilerdiń aldynda sóz sóıledi.

"Olardyń túrmede otyrǵanyn qalamaımyn. Bári óz erkimmen boldy. Mas bolǵandyqtan, jańa sezimdi bastan keshkimiz keldi. Bul jaıynda eshkim eshqashan bilmes edi", — deıdi aqtóbelik áıel sottalǵandardyń ózine qysym kórsetkenin joqqa shyǵaryp.

Onyń ústine áıel adamnyń aıtýynsha, polısıa ana quqyǵynan aıyramyz dep qorqytan soń, mas kúıinde aryz jazyp beripti.

"Polısıa termınderimen shaǵym jazyp berý óz oıyma kelmes edi. Qylmystyq jaýapkershilik týraly maǵan eshkim eskertý jasaǵan joq. Bettestirgen de joq. Polısıa bóliminde prınterdiń kartrıjinen boıaý alyp, kógergen jerlerdi ótirik boıap berdi", — deıdi áıel.

Onyń sózine súıensek, jazda bolǵan jaıttyń vıdeosy da bar. Jazbada áıel adamnyń óz qalaýymen birge bolǵany kórinedi.

Byltyr qyrkúıekte áıel adamǵa qatysty jala jaýyp, bastapqy túsiniktemesinen bas tartqany úshin qylmystyq is qozǵaldy. Kámelettik jasqa tolmaǵan balasy bar jumyssyz ana bes jyldan on jylǵa deıin bas bostandyǵynan aıyrylýy múmkin. Eger sot ony aqtap shyqsa, úsh sottalǵan azamattyń isi de qaıta qaralýy yqtımal.