Ortalyq komýnıkasıalar qyzmetinde turǵyn úıge arnalǵan memlekettik baǵdarlamalardyń iske asyrylýyna arnalǵan baspasóz konferensıasy ótti.
QR Investısıalar jáne damý mınıstri Jeńis Qasymbek «7-20-25» baǵdarlamasynyń barysy týraly aıtyp berdi.
Qazirgi kezde «Nurly jer» memlekettik baǵdarlamasynyń iske asyrylýy men «7-20-25» halyqqa jeńildetilgen nesıe berý baǵdarlamasynyń iske qosylýyna baılanysty turǵyn úı qurylysyna salynǵan ınvestısıanyń ósimi baıqalyp otyr. Atap aıtar bolsaq, 2018 jyldyń 8 aıynyń qorytyndysy boıynsha 702 mlrd teńgege jýyq ınvestısıa tartyldy. Ol ótken jyldaǵy deńgeıden 31 paıyzǵa kóp. Bıyl 7,7 mln sharshymetr turǵyn úı paıdalanýǵa berildi, bul 2017 jyldyń sáıkes kezeńimen salystyrǵanda 112 paıyzǵa artyp otyr. Bul týraly Ortalyq komýnıkasıalar qyzmetinde ótken baspasóz konferensıasynda Investısıalar jáne damý mınıstri Jeńis Qasymbek málim etti.
–Respýblıka boıynsha barlyǵy 67 myńnan astam baspana paıdalanýǵa berildi, onyń ishinde 27 myńǵa jýyq jeke úı bar. Jospar jyl sońyna deıin tolyq kólemde oryndalatyn bolady (jospar 12,1 mln. sharshymetr). Aıta ketetin bir jaıt, buryn jeke turǵyn úı salý qurylysy basym bolsa, qazir kópqabatty úılerdiń kólemi artty. Nesıeler 25 jylǵa deıingi merzimge beriledi. Astana, Almaty, Aqtaý, Atyraý, sondaı-aq Shymkentte halyqty nesıelendirýdiń shekti somasy 20 mln teńgege deıin. Búginde atalǵan qalalarda nesıeni alýdyń ortasha mólsheri shamamen 12 mln 800 myń teńgeni qurady. Sáıkesinshe, aı saıynǵy tólem 85-90 myń teńgege teń, –dep málimdedi Jeńis Qasymbek.
Onyń sózine qaraǵanda, qalǵan óńirlerde nesıe somasy 12 mln teńgege deıingi kólemde. Bul aımaqtarda ótken eki aıda azamattar ortasha eseppen 9 mln teńgeden alyp, aı saıyn 63 myń teńgeden tólep otyr.
Baspana satyp alýǵa múmkindikteri joq halyqtyń áleýmettik álsiz toptary úshin jyl saıyn satyp alý quqyǵynsyz arendalyq 3 myń páter salynady.
–Baǵdarlamada 2 jyl ishinde barlyǵy 6182 arendalyq páterdi (331,0 myń sh. m) paıdalanýǵa berý josparlanǵan. Bıylǵy jyldyń 8 aıyndaǵy 922 páterdi (49,6 myń. sh. m) qosqanda búgingi kúni 3542 páter salyndy (196,2 myń sh. m). Áleýmettik turǵyn úıdiń 1 sharshy metrin jaldaý tólem aqysy shamamen 100 teńgeni quraıdy, – dep atap ótti mınıstr.
Eki jylǵa jýyq ýaqytta ákimdikte kezekte turǵan azamattar (turaqty tabystary bar muǵalimder, dárigerler, memlekettik qyzmetkerler) men «Turǵyn úı qurylys jınaq» júıesi salymshylary úshin bıylǵy 8 aıda tapsyrylǵan 1970 páterdi qosqanda 18,5 myń kredıttik páter paıdalanýǵa berildi.
«Nurly jer» baǵdarlamasy aıasynda bıyldan bastap jyl saıyn 40 myń ýchaskege ınfraqurylym jelilerin tartýdy josparlanyp otyr. 14 oblys ortalyǵynda bir sharshy metriniń quny 120 myń teńgeni quraıtyn biryńǵaı sáýlettik stılde pılottyq jobalardy iske asyrý jalǵastyrylýda.
«Baspana» ıpotekalyq uıymynyń málimeti boıynsha, baǵdarlama bastalǵaly tek eki aıda qatysýshy bankterge ıpoteka alýǵa 2562 ótinim kelip tústi. Onyń ishinde búginde jalpy 20 mlrd tengeden astam somaǵa 1695 ıpotekalyq qaryz berýge qoldaý jasaldy. Qalǵan ótinimder bankterdiń qaraýynda jatyr. Búginde bul trend kúsheıip keledi, ıaǵnı ótinimder sany kún saıyn artýda», - dedi mınıstr.
QR Investısıalar jáne damý mınıstri Jeńis Qasymbek «7-20-25» baǵdarlamasynyń aıasynda páter tapshylyǵy bolmaıtynyn málim etti.
Ortalyq komýnıkasıalar qyzmetinde ótken baspasóz máslıhatynda «Baspana» aksıonerlik qoǵamynyń «7-20-25» baǵdarlamasyn iske asyrý úshin páterlerdiń joqtyǵy týraly aıtqany shyndyqqa janasady ma jáne búginde jaǵdaı rasymen solaı ma?» degen saýal qoıyldy.
«Osy jaıynda málimetti estigen bolatynmyn. Buǵan deıin atap ótkenimdeı, osy jyldyń sońyna deıin 100 myńnan astam baspanany tapsyramyz. Onyń 35 paıyzy jeke úıler bolsa, qalǵan 65 paıyzy kóppáterli turǵyn úıler. Sondyqtan jyldyń sońyna deıin eń az degende 65 myń kóppáterli úıler paıdalanýǵa beriletin bolady», - dedi Jeńis Qasymbek.
