Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń otyrysy ótti.
Otyrysty ashqan G.Ábdiqalyqova Memleket basshysy Nursultan Nazarbaevtyń: «Kún sanap ózgerip jatqan dúbirli dúnıede sana-sezimimiz ben dúnıetanymymyzǵa ábden sińip qalǵan taptaýryn qaǵıdalardan arylmasaq, kósh basyndaǵy eldermen terezemizdi teńep, ıyq túıistirý múmkin emes. Ózgerý úshin ózimizdi myqtap qolǵa alyp, zaman aǵymyna ıkemdelý arqyly jańa dáýirdiń jaǵymdy jaqtaryn boıǵa sińirýimiz kerek», - degen sózine basa nazar aýdardy.
Memlekettik hatshy «Rýhanı jańǵyrý», «Prezıdenttiń bes áleýmettik bastamasy» baǵdarlamalary qoǵamdyq sanany jańǵyrtýǵa jáne ómir súrý sapasyn arttyrýǵa baǵyttalǵanyn atap ótti. Bul turǵyda óskeleń urpaqtyń rýhanı-adamgershilik qasıetterin damytý jáne olardyń quqyqtary men zańdy múddelerin qamtamasyz etý máseleleri erekshe mánge ıe bolyp otyr.
Bilim jáne ǵylym mınıstrliginiń aqparaty boıynsha, Qazaqstanda balalardyń quqyqtary men múddelerin qamtamasyz etý úshin ınstıtýsıonaldyq negiz qurylǵan. Bul rette 15 halyqaralyq qujat ratıfıkasıalandy, Balalar quqyqtary jóninde ýákil ınstıtýty, Balalardyń quqyqtaryn qorǵaý komıteti, qıyn ahýaldaǵy balalarǵa qoldaý kórsetý ortalyqtary jumys isteýde.
Pılottyq joba retinde 71 bilim berý uıymynda «Ózin-ózi taný» rýhanı-adamgershilik bilim berý baǵdarlamasynyń ıntegrasıalaý modeli júzege asyrylýda. Bas prokýratýramen birlese otyryp, kámeletke tolmaǵandar arasyndaǵy zorlyq-zombylyqtyń aldyn alýǵa baǵyttalǵan «Balalardy birge qorǵaımyz» atty jol kartasy iske asýda. Búginde mektepterde 8362 psıholog, 4268 áleýmettik pedagog, 2177 polısıa ınspektory jumys isteıdi.
Densaýlyq saqtaý mınıstrliginiń aqparatyna sáıkes, Qazaqstannyń 2030 jylǵa deıingi otbasylyq jáne genderlik saıasaty tujyrymdamasyn iske asyrý maqsatymen azamattardyń reprodýktıvti densaýlyǵyn nyǵaıtý jáne ana men bala densaýlyǵyn qorǵaý jóninde júıeli sharalar qabyldanýda. Nátıjesinde, 2017 jyly ana óliminiń deńgeıi 1,5 paıyzǵa, balalar ólimi 7 paıyzǵa tómendedi. Óńirlerde 60 úkimettik emes uıymnyń qatysýymen otbasyn josparlaý, ana men bala densaýlyǵyn qorǵaý boıynsha 112 áleýmettik joba iske asyryldy. 5 jasqa deıingi balalarǵa patronajdyq profılaktıkalyq baqylaý júrgizilip, 600-den astam balalar densaýlyǵy bólmeleri uıymdastyryldy. Jastar densaýlyǵynyń 81 ortalyǵynda 125 myńnan asa adamǵa reprodýktıvtik densaýlyqty saqtaý máseleleri boıynsha konsýltasıalyq, zań jáne medısınalyq-psıhologıalyq kómek kórsetildi.
Otyrys sońynda Qazaqstan Respýblıkasynyń Memlekettik hatshysy Gúlshara Ábdiqalyqova memlekettik organdarǵa birqatar naqty tapsyrma berdi.
