Ekonomıkalyq zertteý ınstıtýtynyń áleýmettik-demografıalyq damýdy zertteý ortalyǵynyń dırektory Batjan Aqmoldına qazaqstandyq qoǵamdaǵy demografıalyq tendensıa týraly aıtyp berdi.
«Biz bala týý men ólim-jitimi joǵary kórsetkishke ıe elden bala týý men ólim-jitimi tómen kórsetkishke ıe elge aınalyp kelemiz. Bul demografıalyq aýysym dep atalady. Damyǵan elder 50-60 jyl buryn basyp ketken álemdik tendensıa bizdiń elde jyl sanap aıqyn baıqalýda. Bizde dástúrli bala týý kórsetkishiniń tómendeýimen bul proses anyq baıqalady. Saýalnama júrgizip, jastardan qansha balaly otbasy bolǵyń keledi dep suraǵanymyzda, jartysynan kóbi 2-3 bala dep jaýap beredi. Odan artyq bala tabýdy jón kórmeıdi», - dedi ol Astanada ótken «Qazaqstandyq qoǵamdy jańǵyrtý prosesindegi otbasynyń róli» atty dóńgelek ústel otyrysynyń aldynda.
Sarapshynyń aıtýynsha, buǵan áleýmettik-ekonomıkalyq faktorlar sebep bolyp otyr.
«Adamdarǵa: «Bala sanyn josparlaý kezinde materıaldyq jaǵdaı esepke alynýy kerek pe?» degen suraq qoıyldy. Saýalnamaǵa qatysýshylardyń 83 paıyzy bul suraqqa «ıá» dep jaýap berip otyr. Demek, biz dástúrli qalyptan aýytqyp baramyz. Biz dástúrdi ustanǵan azıalyq memleket bolǵanymyzǵa qaramastan, demografıalyq aýysymnyń tendensıasy bizde aıqyn baıqalyp keledi», - deıdi ol.
Batjan Aqmoldına sonymen qatar, Qazaqstanda jastardyń ajyrasý jaǵdaıy kórshiles elderden qaraǵanda kóp ekenin atap ótti.
«TMD elderiniń ishinde Ózbekstan, Tájikstan sekildi memleketterdeı nekege turý kórsetkishi bizde joǵary bolǵanymen, ol eldermen salystyrǵanda Qazaqstanda ajyrasý jaǵdaıy kóp kezdesedi. Demek, bizde otbasy ınstıtýty dástúrden tys tegeýrinderge tap bolǵan. Ajyrasý jaǵdaılarynyń kóp bolǵany - demografıalyq aýysymǵa da ózindik áserin tıgizip jatyr», - deıdi ol.
