Álemdik fýtbolda oıyp turyp oryn alatyn aty dardaı Krıshtıaný Ronaldý men amerıkalyq sánbıke Ketrın Maıorganyń arasyndaǵy daý áli kúnge deıin sheshimin tappaı, odan saıyn shıelenise tústi. Jaqynda Ronaldý adam sengisiz málimdeme jasady. "Iýventýs" fýtbol komandasy men Portýgalıa ulttyq quramasynyń oıynshysy ózine jabylǵan jala burynǵy komandasy "Real Madrıdtiń" qastandyǵy ekenin aıtty dep jazady Qamshy.kz aqparat agenttigi.
Aıta ketsek "Real Madrıd" fýtbol klýby men Ronaldýdyń arasyndaǵy túsinispeýshilik jeltoqsan aıynan bastalǵan bolatyn. Buǵan "Real Madrıd" fýtbol klýbynyń salyqqa qatysty máselesi kezinde Ronaldýǵa qoldaý kórsetpeýi sebep boldy. Keıin fýtbolshy óz erkimen "Iýventýs" fýtbol klýbyna aýysty. Ronaldý "Real Madrıdte" 9 jyl boıy 292 oıynda óner kórsetip 311 gol salǵan. Keter aldynda Ronaldý óziniń jankúıerlerine "Bul meniń qalaýym, maǵan túsinistikpen qaraısyzdar dep úmittenemin", - dep málimdeme jasady.
"Iýventýs" fýtbol klýbynan ketkennen keıin "Real Madrıdte" Ronaldýdyń ornyn kim almastyrady degen suraq paıda boldy? "Real Madrıd" fýtbol klýby Krıshtıaný Ronaldý ketkennen keıin onyń ornyn almastyratyn oıynshy izdeı bastady. Biraq aýyz toltyryp aıtatyn oıynshy kózge túspedi.
Al jaqynda kútpegen jerden amerıkalyq sánbıke Ketrın Maıorga 9 jyl burynǵy jaıtty negizge alyp, "Ronaldý meni zorlady", - dep ashyq málimdeme jasady. Buǵan deıin bul jaıtty aıtpaýyna Ronaldýdyń bergen aqshasy sebep bolypty. Keıin amerıkalyq bıkeshtiń advokaty "Maǵan Ronaldýdyń zorlyq kórsetkenin aıtyp birneshe qyz habarlasty", dep málimdep, Ronaldýdyń jalǵyz Ketrın Maıorgaǵa emes, taǵy birneshe qyzǵa zorlyq kórsetkenin aıtqan.
Al tanymal fýtbolshy marapattaýlardyń bolmaýyna, «qyz zorlady» degen jalanyń órshýine jáne Chempıondar lıgasynan shettetilýine "Real Madrıd" klýbynyń prezıdenti Florentıno Perestiń qatysy bar ekenine senimdi. Fýtbolshynyń sózine súıensek, Real Madrıdtiń prezıdenti bul qastandyqty ádeıi jasap otyr.
Sonymen birge ol Iýventýs komandasynyń oıyndaryna tolyq daıyndala almaı otyrǵanyna qapaly ekenin jetkizdi.
Al Iýventýs komandasynyń baspasóz hatshysy tanymal fýtbolshynyń basyna túsken bul jaıtqa baılanysty bylaı dep pikir bildirdi:
«Krıshtıaný Ronaldý sońǵy aılarda óziniń kásibıligi men óz isine bar jan-tánimen berilgendigin kórsete bildi. Mundaı qasıetterdi «Iýventýs» baǵalaı biledi. On jyl burynǵy oqıǵa bizdiń tanymal fýtbolshyǵa degen kózqarasymyzdy ózgertpeıdi. Uly chempıonmen aralasatyn, jaqsy tanıtyn adamdardyń barlyǵy osyndaı pikirde».
