Elbasynyń 5 áleýmettik bastamasynyń iske asyrylýyn talqylaý «Nur Otan» partıasynyń Almaty qalasyndaǵy fılıalynda jalǵasty. Qoǵamdyq otyrysta shahar basshysy Baýyrjan Baıbek Astanadan kelgen qonaqtarǵa atalmysh bastama aıasynda atqarylǵan jumystardy baıandady.

Búginde qalada 22 myńnan astam adam turǵyn úı kezeginde tur. Sondyqtan bolashaqta halyqty baspanamen qamtý úshin qarqyndy qurylys júrgizilmek. Boljam boıynsha, 2035 jylǵa qaraı alyp shahar turǵyndarynyń sany 3 mıllıonǵa jetedi. Osyǵan oraı, qoljetimdi baspana salýǵa basymdyq berilmek.

Byltyr qalada 1 mln 920 myń sharshy metr turǵyn úı salynsa, osy jyly 15 myń 400 páter boı kótermek. Páterler memleket usynǵan túrli tıimdi baǵdarlamalar arqyly úlestiriledi. Máselen, «7-20-25» baǵdarlamasy aıasynda nesıe alýǵa ótinish bildirgen otandastarymyzdyń 38 paıyzy Almatydan úı alýǵa nıettengen. Onyń teń jartysy qazirdiń ózinde maquldanypty. Sonyń arqasynda 480 otbasy baspanaly bolmaq. Al «Nurly Jer» baǵdarlamasy aıasynda bıyl 6 myńnan astam páter qoldanysqa beriledi.  

«Almaty jastary» qalalyq turǵyn úı baǵdarlamasy boıynsha sońǵy eki jylda 3 mlrd teńge bólindi. Ótken jyly jeńildetilgen shartpen 108 jas otbasy páter aldy. Al bıyl osy baǵdarlama arqyly keminde, 200 páter bólinedi. Biz kóp balaly jáne az qamtylǵan otbasylarǵa, sondaı-aq múmkindigi shekteýli jandarǵa qoljetimdi baspana salýdy jalǵastyramyz. Memleket ınjenerlik jelilerdi tartý arqyly qurylysty sýbsıdıalaıdy», –dedi Almaty qalasynyń ákimi Baýyrjan Baıbek.

Turǵyn úıden bólek, jıynda «joǵary bilim berý», «shaǵyn nesıe berýdi kóbeıtý» jáne «eldi gazben qamtamasyz etý» máselesi de qozǵaldy. Qazir Almatynyń 96 paıyzy gazdandyrylǵan bolsa, jyl sońyna deıin jeke sektordyń barlyǵy kógildir otynǵa kóshiriledi. Bul qala tazalyǵyn saqtap, ekologıalyq ahýaldy jaqsartýǵa múmkindik týǵyzady.

Al az qamtylǵan otbasylarǵa áleýmettik kómek berý úshin qala tarapynan qoldaý áli de jalǵasyn tappaq. Iaǵnı, áleýmettik az qamtylǵan otbasylardy qoldaý úshin qala búdjetinen bólinetin 179 mlrd teńge keler jyly da kemimeıdi. Sanaq boıynsha, 210 myń almatylyq 25 aılyq eseptik kórsetkishten tómen jalaqy alady eken. Endi olardyń salyq mólsheri tómendetilmek.

«Memleket basshysynyń ekinshi bastamasy boıynsha salyq zańnamasyna barlyq qajetti ózgerister 2 shildede engizildi. Osyǵan oraı, 25 aılyq eseptik kórsetkishten tómen jalaqy alatyn jumysshylar úshin salyǵy 10 esege tómendetildi. Atalǵan mehanızm 2019 jyldyń 1 qańtarynan bastap iske qosylady», – dedi «Prezıdenttiń 5 áleýmettik bastamasyn» iske asyrýdy baqylaý boıynsha Qoǵamdyq keńestiń tóraǵasy Baqytjan Jumaǵulov.

«Almatyda bizdiń oıymsha, Elbasynyń 5 áleýmettik bastamasy nátıjeli júzege asyrylyp jatyr. Elbasymyzdyń bul bastamasy halyqtyń ál-aýqatyn ary qaraı arttyrýǵa baǵyttalǵan. Osy jumystardyń tolyqtaı, ýaqytyly jáne sapaly túrde júzege asýyna bizdiń partıamyz qoǵamdyq baqylaý júrgizýde», – dedi «Nur Otan» partıasy tóraǵasynyń birinshi orynbasary Máýlen Áshimbaev.