Almatyda jańadan salynǵan stýdentter úıiniń sapasy syn kótere me? Búgin «Nur Otan» partıasy tóraǵasynyń birinshi orynbasary Máýlen Áshimbaev Almaty ákimi Baýyrjan Baıbek jáne Respýblıkalyq qoǵamdyq komısıa músheleri qaladaǵy jańa jataqhanalardy aralady. Sonymen qatar, olar «7-20-25» baǵdarlamasy arqyly baspana alǵandarǵa páter kiltin saltanatty túrde tabystap, qala basshysymen birge Elbasynyń 5 áleýmettik bastamasynyń oryndalý barysyn pysyqtady.

Bas partıa tóraǵasynyń birinshi orynbasary Máýlen Áshimbaev aldymen Asfendıarov atyndaǵy Qazaq ulttyq medısınalyq ýnıversıtetiniń jańadan salynǵan jataqhanasymen tanysty. 600 oryndyq stýdentter úıi zamanaýı talapqa tolyqtaı saı keledi. Munda 75 adamǵa arnalǵan asqana, 70 oryndyq oqý zaly, sondaı-aq, 1-shi qabatta jastar ortalyǵy da bar. Ǵımaratty turǵyzýǵa 780 mıllıon teńge jumsalypty.  

«Qazir 2 jarym myńdaı stýdentke jataqhana jetpeı jatyr. Biraq jańa jataqhanany salsaq, jataqhana qajet etetin stýdentter sanyn 1 myń jarymǵa deıin qysqartamyz», – dedi S. Asfendıarov atyndaǵy Qazaq ulttyq medısınalyq ýnıversıtetiniń rektory Talǵan Nurǵojın.

Jalpy, Almatyda jyl sońyna deıin 4 jańadan salynǵan jáne qaıta jańǵyrtylǵan 1650 oryndyq 1 jataqhana paıdalanýǵa berilmek. Odan bólek, 2300 orynǵa arnalǵan 3 jańa stýdentter úıiniń qurylysy bastalady. Al kelesi jyly 26 jataqhana turǵyzý josparda bar. Stýdentter zamanaýı ǵımarattarda turyp, bilim alyp jatqandaryna dán rıza.    

«Stýdentter úıinde barlyq stýdenttiń bos ýaqytyn tıimdi paıdalaný maqsatynda kóptegen úıirmeler, bı, vokal úıirmeleri jumys isteıdi. Jalpy, stýdentterdiń bilim alýymen qatar, bos ýaqyttaryn tıimdi ótkizýge kóptegen jaǵdaılar jasalǵan», – dedi Qazaq ınjenerlik-tehnologıalyq ýnıversıtetiniń stýdenti Merýert Bataı.

Máýlen Áshimbaev jáne Respýblıkalyq qoǵamdyq komısıa músheleri óz isin damytý maqsatynda memleketten shaǵyn nesıe alǵan kásipkerlermen kezdesti. Máselen, Dınara Qazıeva alǵan qarajatyna óziniń jeke stomatologıasyna jańa jabdyqtar satyp alǵan. Sonymen qatar, birneshe mamandy jumyspen qamtyp otyr. Osy kúni Almatyda shaǵyn nesıe berý úshin 80 túrli joba maquldansa, olardyń 20-y endigi mamandar qaraýyna ótkizilgen.  

Almatynyń Alataý aýdanynda jańa páterge «7-20-25» baǵdarlamasy arqyly qol jetkizgender Máýlen Áshimbaevtyń qolynan páter kiltin saltanatty túrde aldy. Almaty ákimi Baýyrjan Baıbek atalǵan baǵdarlamanyń qalada júıeli túrde júzege asyp jatqanyn jetkizdi.

«Búgin mıkrokredıtter berý máselesin qadaǵaladyq. Stomotologıa kabınetinde boldyq. Jańa jumys oryndary bizdiń qalamyzda ashylyp jatyr. Birneshe jataqhanany araladyq. Jastarǵa, stýdentterge keremet jaǵdaı jasalýda. Al «7-20-25» baǵdarlamasy – jalpy Elbasy tapsyrmasy boıynsha qarapaıym halyqqa, ásirese Almaty qalasynyń turǵyndaryna arnalǵan baǵdarlama», – dedi Almaty qalasynyń ákimi Baýyrjan Baıbek.

«Nur Otan» partıasy tóraǵasynyń birinshi orynbasary Máýlen Áshimbaev nysandardy aralap bolǵan soń, Almatyda Elbasynyń 5 áleýmettik bastamasy qarqyndy júzege asyrylyp jatqanyn aıtty.  

«Búgingi kúni halyq Elbasynyń 5 áleýmettik bastamasyna rızashylyq tanytyp otyr. Ony biz barǵan barlyq óńirlerden baıqaýǵa bolady. Óıtkeni, Elbasy bastamasy biraz áleýmettik máselelerdiń sheshilýine septigin tıgizýde. Sondyqtan  partıamyz ary qaraı da osy áleýmettik bastamalardyń tolyqtaı, ýaqytyly júzege asýyna úles qosatyn bolamyz», – dedi «Nur Otan» partıasy tóraǵasynyń birinshi orynbasary Máýlen Áshimbaev.