ALMATY FILM kınofestıvalinde usynylǵan týyndylardy 10 myń kórermen tamashalady. Degenmen, bul san áli de artýy múmkin. Óıtkeni, búgin kınobáıge kórsetilimderiniń sońǵy kúni bolǵanyna qaramastan, uıymdastyrýshylar konkýrstyq baǵdarlamaǵa qatysqan týyndylardy erteń de qaıtalap kórsetpekshi. Al tórt kún boıy festıválge tórelik etken qazylar eń myqty fılmniń avtoryn anyqtaý ústinde.

Tórt kún boıy kınosúıer qaýymǵa úlken qýanysh syılap, alýan túrli fılmderdi kórýine múmkindik bergen ALMATY FILM festıvali óz máresine jetýge taıady. Shara bastalǵaly kórermender 30 kınotýyndy tamashalaǵan. Olardyń 10-y konkýrstyq baǵdarlamaǵa qatysyp jatyr. Kınofestıval tuńǵysh ret uıymdastyrylyp otyrǵanyna qaramastan, kórermen tarapynan úlken qoldaý tapty. Sondyqtan bolar, kórsetilimderde ıne shanshyr oryn joq. Ásirese, otandasymyz Ádilhan Erjanovtyń fılmi anshlagpen ótken.

«Men ózimizdiń almatylyq kınofestıvaldiń bolýyn kópten kúttim. Bul festıvál burynǵylarǵa uqsamaıdy. Munda kóbinese jastar qatysýda. Eshkimniń shyǵarmashylyq kózqarasyna shekteý joq, barlyǵy erkin, táýelsiz túrde ótýde. Meni ásirese, kınogerlerdiń ózara jaqyn aralasýy jáne kórermenderdiń fılmderge erekshe qyzyǵýshylyq týdyrýy qýantty. Keshe óz fılmim kórsetilgende, zal lyq toly boldy. Qatty tań qaldym. Báıgede jeńip shyǵý maqsatym emes, eń bastysy, kórermenge týyndymdy kórsetkenime qýanyshtymyn», – dedi kınorejısser, ALMATY FILM FESTIVAL qatysýshysy Ádilhan Erjanov.

ALMATY FILM festıvali jas bolsa da, álemge belgili kınofestıvalderden esh kem túspeıdi. Ásirese, jahanǵa tanymal kınogerlerdiń Almatyǵa aıaq basýy sharanyń mártebesiniń bıik ekenin ańǵartady deıdi qatysýshylar. Festıvál aıasynda aty álemge áıgili rejıserler sheberlik sabaqtaryn ótkizýde.

«Bul kınofestıval tuńǵysh festıválge uqsamaıdy. Barlyǵy joǵary deńgeıde uıymdastyrylǵan. Óz basym Almatyǵa tórtinshi ret kelip otyrmyn. Qala jyldan jylǵa kórkeıip keledi. Al bul festıvál qalanyń atyn álemge áıgilep, birlesken ónim jasaýǵa múmkindik beredi», – deıdi kınorejısser (Ońtústik Koreıa) Kım Kı Dýk.

Qazaqstandyq kórermender festıvál kezinde tyń týyndylardy tamashalady. Ásirese, joǵalýdyń aldynda turǵan janýarlar jaıly túsirilgen «Panda» fılmin kınosúıer qaýym jyly qabyldady.

«Pandany barlyq elde jaqsy kóredi. Bul fılmniń sátti shyǵýynyń kilti de osynda. Biz fılmde pandalardy saqtap qalý týraly baǵdarlama jaıynda aıtamyz. Sizderdegi joǵalý qaýpi tónip turǵan qar barysy týraly da estidim. Ol óte sırek kezdesetin jyrtqysh. Olar týraly fılm túsirgim keler edi. Eger osy oıymdy júzege asyrýǵa kómektesetin ǵalymdar tabylsa, qýanar edim», – dedi kınorejısser (AQSH) Drú Felman.

Jalpy, ALMATY FILM kınofestıvalinde usynylǵan týyndylardy búginge deıin 10 myń kórermen tamashalaǵan. Degenmen, bul san áli de artýy múmkin. Óıtkeni, uıymdastyrýshylar erteń kúndiz konkýrstyq baǵdarlamaǵa qatysqan týyndylardy qaıtalap kórsetpekshi. Al keshke qaraı saltanatty sharanyń jabylý rásimi bolady. Aıta ketsek, festıváldiń jabylýy kezinde Bas júldeni jeńip alǵan týyndy qaıtadan qoıylatyn bolady.