Sanaly ǵumyryn Otan qorǵaý isine arnaǵan general-leıtenant Málik Saparovty bir top áriptesteri men týǵan-týystary eske aldy. Ol kózi tiri bolǵanda, bıyl 60 jasqa tolar edi.

General mereıtoıyna oraı áskerı ınstıtýtta saltanatty sherý ótti. Qazaqstannyń qarýly kúshterin damytýda aıanbaı eńbek etken qaıratkerge arnaıy foto jáne kitap kórmesi de uıymdastyryldy.

Aıta keteıik, Málik Saparov ár jyldary elimizdiń Qarýly kúshteriniń Bas shtab basshysy, Qorǵanys mınıstriniń birinshi orynbasary qyzmetterin atqarǵan.  

«Óz jumysyn óte jaqsy atqarǵan, janyn aıamaı úzdiksiz qyzmet etken general-leıtenant Saparov QR Qarýly kúshteriniń qalyptasyp, damýyna zor úles qosqan. Men de osy uly batyrymyzdyń izin qýyp, osy áskerı ınstıtýtqa túsip, elimizdiń damytýyna zor úles qossam deımin», – deıdi Qurlyq áskerleri áskerı ınstıtýtynyń kýrsanty Asylhan Uzaqbaı.