Almatyda «Nur Otan» partıasy Almaty qalalyq fılıalynyń kezekti HHİİ esep berý-saılaý konferensıasy ótti. Jıynda eki jylda atqarǵan jumys talqylanyp, sondaı-aq jańa josparlar men mindetter alǵa qoıyldy. Sonymen qatar, Almaty qalasyn damytý máseleleri qaralyp, qalalyq fılıaldyń Saıası keńesiniń jańa quramy saılandy, máslıhat depýtattyǵyna kandıdattar usynyldy.

Eki jyl ishinde «Nur Otan» partıasy Almaty qalalyq fılıaly qoǵamdyq qabyldaý bólmesine 14 myńnan astam azamattan ótinish kelip túsken. Sonyń ishinde, úshten biri, ıaǵnı 28 paıyzy oń sheshimin tapqan. Qalǵany boıynsha konsýltasıalyq kómek kórsetilip, túsiniktemeler berilgen. Jurttyń saýaly negizinen, áleýmettik qamsyzdandyrý, turǵyn úı komýnaldyq sharýashylyq, jumyspen qamtý jáne jer telimderin bólý máselelerine qatysty.

«Partıa fılıaly Elbasynyń bıylǵy 5 áleýmettik bastamasynyń Almatyda oryndalýyn qadaǵalaý jóninde arnaıy qalalyq Qoǵamdyq keńes quryp, onyń quramyna jalpy 28 adam, ıaǵnı depýtattar men ózge de saıası partıanyń músheleri, azamattyq qoǵam ókilderi, birqatar kásipkerlermen qatar, jastar uıymdarynyń ókilderi endi. Jaqynda Almatyǵa arnaıy kelgen Elbasy «Nur Otan» partıasynyń tóraǵasy Nursultan Ábishuly Nazarbaev qalamyzda atqarylyp jatqan jumystarǵa oń baǵasyn berdi. Álbette bul jetistikke jetýde nurotandyqtardyń da eńbegi zor ekendigi sózsiz», – dedi «Nur Otan» partıasy Almaty qalalyq fılıalynyń tóraǵasy, Almaty qalasynyń ákimi Baýyrjan Baıbek.

Almaty qalasynyń ákimi Baýyrjan Baıbek qalalyq partıa baqylaýynyń arqasynda Almatyda monopolıserdi komýnaldyq qyzmetti tutynýshylarǵa 4,7 mıllıard teńgege jýyq ótemaqyny tóleýge mindettegenin atap ótti. Qalada jylý, elektr qýaty, sý jáne káriz júıesiniń tarıfteri jyldyń sońyna deıin burynǵy deńgeıde qalady, al gaz úshin tólem 4 paıyzǵa tómendetildi. Odan bólek, partıa bastamasymen qalada eleýli áleýmettik-ekonomıkalyq ózgerister boldy.

«Almatynyń tarıhı ortalyǵy sanalatyn «Astana» alańy, Abylaı han, Abaı, Nazarbaev dańǵyldary, Panfılov, Jibek joly, Gogol kósheleri qalaı jańaryp, jasarǵanyn halyq kórip otyr. Turǵyn úı, bilim berý, densaýlyq, mádenıet jáne sport salalaryndaǵy áleýmettik nysandar qarqyndy turǵyzylýda. Úsh jyldyń ishinde 3700-den asa aýlanyń 35 paıyzynyń, ıaǵnı 1338 aýlanyń abattandyrylýy – buryn-sońdy bolmaǵan is», – dedi «Nur Otan» partıasy Almaty qalalyq fılıaly tóraǵasynyń birinshi orynbasary Juldyz Omarbekova.

«Almaty jastary» qoljetimdi baspana baǵdarlamasy men Almaty áýejaıyn jańǵyrtý, qalalyq avtobýs parkin 30 paıyzǵa jańartý jáne 2 jańa metro stansıasynyń qurylysy syndy jumystardyń atqarylýyna «Nur Otan» partıasy uıytqy bolyp otyr. Odan bólek, «Almatyny damytýdyń 50 joba-draıveri» bastamasy sheńberinde 180 mlrd teńge somasyna 41 joba iske asyrylyp jatyr. «Nur Otan» partıasy Almaty qalalyq fılıalynyń kezekti HHİİ esep berý-saılaý konferensıasynda saıası keńeske jańa qurama saılanyp, Almaty máslıhatyndaǵy bos orynǵa úsh kandıdat usynyldy.