Almatyda halyq qaharmany, qalamger-partızan Qasym Qaısenovtyń 100 jyldyq mereıtoıy atalyp ótti.

Arda azamat 23 jasynda surapyl soǵysqa attanyp, Ýkraına jerinde Chapaev atyndaǵy partızan quramasynyń úshinshi otrádyn basqarǵan. Soǵys aıaqtalǵan soń eline oralyp, birneshe laýazymdy qyzmette eńbek etken. Soǵystan soń qarýyn qalamǵa aýystyrǵan ol «Ilko Vıtrák», «Pereıaslov partızandary», «Ajal aýzynan», «Jaý tylyndaǵy bala» syndy kitaptardy jazady.

Batyrdy eske alý keshi Abaı atyndaǵy opera jáne balet teatrynda uıymdastyryldy. Sharaǵa marqumnyń et jaqyndary men dostary, sondaı-aq Almaty ákimi Baýyrjan Baıbek kelgen. Qala basshysy Elbasynyń quttyqtaý sózin jınalǵan qaýymǵa oqyp berdi.  

«Halqymyz ardaqty azamatynyń esimin eshqashan umytpaıdy dep senemin. Onyń rýhanı murasy oqyrmandarǵa usynylyp, jarqyn beınesi, kórkem shyǵarmalary men túrli óner týyndylary arqyly halyqtyń jadynda udaıy jańǵyra berýge tıis. Búgingi kesh te osyndaı ıgi maqsatpen uıymdastyrylyp otyr. Saltanatty jıynnyń taǵlymdy da mazmundy ótýine tilektespin. Qazaqstan Respýblıkasynyń Prezıdenti Nursultan Nazarbaev», – delingen QR Prezıdentiniń quttyqtaý sózinde.