Almatylyqtar Qala kúnin dýmandatyp atap ótti. Keshe mereke alańdarynda 100 tonnadan astam alma saýdalandy. Alyp shahardyń týǵan kúnine oraı uıymdastyrylǵan Apple Fest alma festıvalinde qalanyń basty jemisin sharýa qojalyqtary turǵyndarǵa qoljetimdi baǵamen satty.

Dástúrli Alma festıvaliniń bıyl aýqymy keń. Megapolıs basshysy Baýyrjan Baıbek qala turǵyndaryn aıtýly merekemen quttyqtap, Almatyny damytý jolynda atqarylyp jatqan jumystardy aıtyp ótti.

Búginde «Adamdarǵa arnalǵan qala» jobasy aıasynda tarıhı ortalyqtyń 60 paıyzy jańardy. Qalanyń sáni kelisip, ál-aýqaty artyp keledi. Saltanatty shara barysynda «Almaty qalasynyń qurmetti azamaty» ataǵyn alǵan azamattarǵa marapattar tabystaldy.

«Myń jyldyq tarıhy bar kıeli meken – Almaty eń aldymen, Elbasy atap ótkendeı, Táýelsizdigimizdiń altyn besigi. Búginde Almaty elimizdiń óner men bilim, ádebıet pen mádenıet, qarji, sport pen týrızm ortalyǵyna aınaldy. Ómir súrýge, bilim alýǵa, eńbek etýge, bıznes júrgizýge qolaıly, týrıser úshin tartymdy, orta Azıadaǵy iri óńirlik magnıt», – dedi Almaty qalasynyń ákimi Baýyrjan Baıbek.

Qala turǵyndary men qonaqtarynyń alańsyz tynyǵýy úshin merekelik sharalarda bar jaǵdaı jasaldy.  Almadan jasalǵan ártúrli ınstallásıalar quryldy. Bir mezgilde bir alańda birneshe shara ótti.  

«26 sort jetkizildi. Olardyń ataýyn túgel tizip aıtyp shyǵý múmkin emes, aporttan bastap «Amerıkanka», «Vosqod», «Zolotoe prevosqodnoe», «Túlpan» sıaqty túrleri tolyp jatyr. Alma ósirýmen aınalysatyndyqtan, aýdanda, oblysta bári qurmet kórsetip, izgi nıet-tilekterin bildirip otyrady. Men osy almalardy kútip-baptap júrip, keıde sharshaǵanymdy umytyp ketemin», – deıdi Aqlıma Bekmaǵambetova.