Megapolıs basshysy jańarǵan birneshe kóshelerdi aralap shyqty. Onyń ishinde, Abaı dańǵylynda da boldy.

Dańǵyldy modernızasıalaý aıasynda jaıaý júrginshi keńistigi keńeıdi, asfálttyń ornyna kespe tastar tóseldi. Jaqyn arada zamanaýı jáne óte qolaıly kóshe jıhazdary qoıylatyn bolady.

Bulardan ózge, jańa jaryq dıodty kóshe jáne troýtar shamdary ornatylýda. Jańa fontandar salý men ǵımarattardyń syrtyn jańartý jumystary aıaqtalyp qaldy. Qazan aıynda ártúrli 1000-nan astam aǵash otyrǵyzylady.

Almaty ákimi Baýyrjan Baıbek jumys sapary barysynda merdigerdiń nazaryn jiberilgen kemshilikterge jáne atqarylǵan isterdiń barlyǵy qala turǵyndaryna qolaıly bolýy tıis ekenine aýdardy.

«Múmkindiginshe, qalada kedergisiz ortany qalyptastyrý qajet. Kóp jerde pandýstar qarastyrylmaǵan, sonyń ishinde Sport jáne týrızm akademıasy aldyndaǵy jańa fontan mańynda. Ketken kemshilikterdi túzetińizder», – dedi Baýyrjan Baıbek.

Megapolıs basshysy qozǵalys bóligine tym jaqyn ornalasqan kólik beketteri keshenderin aýystyrýdy jáne jolaýshy aǵyny jıi Ortalyq stadıon jany men ózge de ýchaskelerge qosymsha beketter ornatýdy tapsyrdy.

Naýryzbaı batyr kóshesi qıylysyna skver jasaý máselesi qaıta qaralady, burynǵy Túrkisib aýrýhanasynyń mańyn jasyldandyrý kólemi artady.

Buryn stıhıaly kólik turaǵy bolǵan Seıfýllın dańǵylynyń batys bóligine kishi pishindi arhıtektýralyq formalar qoıylady, jasyldandyrylady jáne zamanaýı formattaǵy saýda oryndary paıda bolady.

Masanchı kóshesiniń shyǵysyna qaraı kezinde doner jasaýshylar basyp alyp, turǵyndardyń renishin týǵyzǵan ýchaskege jasyl jelek otyrǵyzylady.

Birqatar ýchaskege, sonyń ishinde Lermontov atyndaǵy teatr aldyndaǵy alańǵa trotýar plıtkasy qaıta tóseledi.

Jumys sapary barysynda Baýyrjan Baıbek Jeltoqsan kóshesinde de boldy jáne «Táýelsizdik tańy» eskertkishi mańynda qaýipsizdik aımaǵyn jasaýdy tapsyrdy.

Buryndary megapolıs basshysy Respýblıka saraıy aldyndaǵy alańǵa trotýar plıtkalaryn tóseýde jiberilgen kemshilikterdi túzetýdi tapsyrǵan bolatyn. Bulardan ózge, qala ákimi Abylaı han dańǵylyn qaıta jasaǵan «Elıtstroı» kompanıasynyń enshiles merdigerlik uıymynyń jumysyn synǵa alyp, olqylyqtardyń ornyn toltyrýǵa eki aı merzim berdi.

Aıta keterligi, jalpy Almatyda bıyl 524 kóshe jóndeldi, 1400 eski aýla jańardy. 300 km aryq salyndy jáne jóndeldi, 800 km ınjenerlik jeli tartyldy.

Qalanyń barlyq jerasty ótpeli joly jańardy. Jyl aıaǵyna deıin barlyq kóshe jaryqtarynyń úshten biri jaryq dıodty jáne energıa jınaqtaýshy shamdarǵa aýystyrylady.