Almatyda kósheler oıylyp, qandaı da bir aqaý shyqsa, merdigerler ony 10 kún ishinde jóndeýi tıis. Budan bylaı qalada aǵymdaǵy jóndeý jumystary memlekettik-jekemenshik áriptestik aıasynda júrgiziledi. Bul úshin qala búdjetinen 5 mlrd teńgeden astam qarjy bólinedi. Joba máslıhattyń kezekti sesıasynda maquldandy.

Jańa júıege sáıkes, 4 merdiger kompanıamen 5 jylǵa kelisim-shart jasalady. Ár merdigerdiń moınyna qalanyń qos aýdanyndaǵy tas jol júkteledi. Iaǵnı, turǵyndar kóshe joldarynyń tesilgenin baıqasa, birden sýretke túsirip, qala ákimdigine joldaı alady. Jaýapty basqarma ol aqaýdy jóndeý úshin kelisim-shartqa otyrǵan merdiger uıymǵa sol mekenjaıdy jiberedi. Al jol jóndeýshiler shaǵym túsken boıda ol jerdi dereý taqtaıdaı tegis etýi tıis.

«Mysaly, Almaty qalasynyń turǵyny kele jatqan kezde jolda belgili bir aqaýdy kórgen jaǵdaıda, ınstagrammǵa túsirip jiberýi múmkin. Bizde áleýmettik jelilerge monıtorıń jasaıtyn arnaıy bólim bar. Sol bólimder bizge jiberedi. Ony alǵan kúnnen bastap biz dereý merdigerlerge joldaımyz. Merdigerler, árıne, sol aqaýdy alyp tastap jóndeýge kirisedi. Jóndeý úshin bizdiń kelisim-shart boıynsha 10 jumys kúni beriledi», – dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Qanat Baıqońyrov.

Eger merdigerler 10 kún ishinde oıylǵan joldy ornyna keltirip úlgermese, jazalanady. Tipti, jasalǵan jumystyń kólemine qaraı tólenetin aı saıynǵy aqshasynyń 5 paıyzynan qaǵylady. Aǵymdaǵy jóndeý jumystaryn 5 jyl kóleminde belgili bir merdiger uıymǵa tapsyrýdyń tıimdi tustary kóp deıdi jobany usynýshylar. Olar burynǵydaı tender ótkizip, kóp ýaqytyn joǵaltpaıdy. Demek, shurq tesilgen qala kósheleri turǵyndardy kóp kúttirmeı, der kezinde jóndelmek.  

«Bul joba Almaty qalasyna óte tıimdi. Sebebi, biz jyl saıyn konkýrstyq prosedýralar, búdjettik prosedýralardy ótkizgen kezde kóp ýaqyt joǵaltatyn edik. Al qazirgi tańda osy joba arqyly biz uzaq jylǵa, ıaǵnı 4 jyl 5 aıǵa kelisim-shartqa otyrý negizinde árdaıym júıeli jumys isteı alamyz. Iaǵnı, kóp ýaqytty únemdeımiz jáne búdjettiń shyǵyndaryn azaıtamyz», – dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Qanat Baıqońyrov.