«Almatynyń qurmetti azamaty» mártebesine ıe bolǵan turǵyndardyń esimderi belgili boldy. Olardyń qatarynda ataqty kompozıtor, Qazaqstannnyń Halyq ártisi Eskendir Hasanǵalıev, Ulttyq ǵylym akademıasynyń akademıgi, ǵalym  Serik Qırabaev jáne qazaq tarıhynda tuńǵysh elshi bolǵan áıel – Aqmaral Arystanbekova bar.

Bul adamdar Qazaqstannyń damýyna ár salada úlken úles qosqan. Máselen, Eskendir Hasanǵalıev jarty ǵasyrlyq shyǵarmashylyq ǵumyrynda halyqqa 200-den astam tamasha mýzykalyq týyndylardy tartý etti. Olardyń kópshiligin jurt áli kúnge tamsanyp oryndaýda. Sonyń biri ataqty «Atameken» áni. Al Serik Kırabaev 600-ge jýyq ǵylymı eńbektiń avtory bolsa, Aqmaral Arystanbekova  elimizdiń Birikken Ulttar Uıymyndaǵy birinshi jáne turaqty ókili boldy.

Qalalyq máslıhat depýtattary atalǵan úsh azamattyń kandıdatýralaryn biraýyzdan maquldap,  «Almatynyń qurmetti azamaty» ataǵyn berdi.  

«Usynylǵan kandıdattardyń bizdiń qalamyzdyń ǵana emes, búkil el tarıhynda etken eńbegi orasan ekenin eskere otyryp, Arystanbekova Aqmaral Haıdarqyzyna, Qırabaev Serik Smaıylulyna jáne Hasanǵalıev Eskendir Ótegenulyna «Almaty qalasynyń qurmetti azamaty» ataǵyn berýdi qoldaýlaryńyzdy suraımyz», – dedi Almaty qalasy ákiminiń orynbasary Arman Qyryqbaev.