QR Ulttyq kitaphanasynda QR Darhan Káletaevtyń tóraǵalyǵymen «Daryn» Memlekettik jastar syılyǵyn taǵaıyndaý jónindegi komısıanyń qorytyndy otyrysy bolyp ótti.

Komısıa jumysyna Qazaqstan Respýblıkasy Parlamenti Májilisiniń depýtattary, mádenıet jáne óner qaıratkerleri, memlekettik organdar, buqaralyq aqparat quraldary, azamattyq sektor ókilderi qatysty.

Otyrysty ashqan QR Qoǵamdyq damý mınıstri Darhan Káletaev 2018 jyly «Daryn» Memlekettik jastar syılyǵynyń mólsheri 3 esege artyp, ár nomınasıa boıynsha 600 myń teńge úlestiriletin aıtty.

Usynylǵan úmitkerlerdi qarastyrǵan  komısıa músheleri 2018 jylǵy «Daryn» Memlekettik jastar syılyǵynyń laýreattaryn anyqtady. Syılyqaqyny berý týraly sheshim ony Qazaqstan Respýblıkasynyń Úkimeti qabyldaǵan sátten bastap kúshine enedi jáne jeńimpazdar aǵymdaǵy jyldyń jeltoqsan aıynda ótetin saltanatty rásim barysynda marapattalatyn bolady.

Bıylǵy jyly aıtýly marapatqa ótinim bildirgenderdiń sany  rekordtyq mejege jetti, naqtyraq aıtqanda 301 ótinish kelip túsken.  Onyń ishinde 271 ótinim qabyldanyp, qaraldy.

Nomınasıalar boıynsha kelip túsken ótinishter sany kelesideı: «Teatr jáne kıno» - 41, «Jýrnalısıka» - 15, «Ádebıet» - 18, «Sport» - 37, «Estrada» - 21, «Klasıkalyq mýzyka» - 17, «Halyq shyǵarmashylyǵy» - 20, «Dızaın jáne beıneleý óneri» - 17, «Ǵylym» - 48, «Qoǵamdyq qyzmet» -  37 ótinish. 2016 jyly-126, 2017 jyly- 213 ótinim kelip túsken.

Qazaqstan Respýblıkasy Parlamentiniń depýtaty, Olımpıada chempıony, Daryn syılyǵy boıynsha komısıanyń  «Sport» seksıasynyń jetekshisi Serik Sápıevtiń paıymdaýynsha, atalǵan syılyq Qazaqstan jastaryn qoǵam men memlekettiń ıgiligi jolynda jańa jeńister men jetistikterge jigerlendiredi.

«Men ózim «Daryn» syılyǵynyń laýreaty boldym. Atalǵan syılyqty alǵandar úshin ǵana emes, sonymen qatar Daryn syılyǵyna usynylǵandarǵa da úlken shabyt beredi. Jastar ózderiniń qatarlastarynyń jetistikterge jetip, syılyqqa ıe bolyp jatqandaryn kórip, olarda belgili bir nátıjege jetý jolynda  kúsh-jigerlerin salatyn bolady»-dedi Serik Sapıev.

BUU Jas kóshbasshylar qaýymdastyǵynyń múshesi, «CentrAsia Group» holdıńiniń bas dırektory, komısıa múshesi Oljas Súleımenovtyń aıtýynsha, «Daryn» syılyǵynyń deńgeıi jyl saıyn artyp keledi.

«Búgingi komısıa jumysyn óte qarqyndy, ashyq pikirtalas túrinde ótti dep aıtýǵa bolady. Barlyq úmitkerler laıyqty. Bizdiń elimizde ártúrli salalarda jáne árqaısysy óz salalary boıynsha tabysty bolǵan kóptegen jastar bar ekendigin maqtan tutamyn. Komısıanyń múshesi bolý úlken qurmet. Meniń oıymsha, «Daryn» memlekettik syılyǵynyń deńgeıi  jyl saıyn artyp keledi», - dedi O.Súleımenov.

Esterińizge sala keteıik, «Daryn» Memlekettik jastar syılyǵy jyl saıyn jastardyń ǵylym, shyǵarmashylyq, qoǵamdyq qyzmet, sondaı-aq joǵary sporttyq jetistikterine qoldaý kórsetý maqsatynda tabystalady. «Daryn» syılyǵynyń  jeńimpazdaryna  Qazaqstan Respýblıkasy Úkimetiniń qaýlysymen Daryn memlekettik jastar syılyǵynyń laýreaty» ataǵy beriledi jáne olar  dıplommen, tósbelgilermen jáne aqshalaı syılyqtarmen marapattalady.