Búgin Úkimet otyrysynda «Prezıdenttiń bes áleýmettik bastamasynyń» júzege asyrylý barysy talqylandy. Onyń ishinde eń mańyzdylarynyń biri bıylǵy jyldyń shilde aıynda bastalǵan «7–20–25» baǵdarlamasy boıynsha Ulttyq bank tóraǵasy Danıar Aqyshev esep berdi. Biraq ol jalpylama baǵdarlama erejelerin túsindirý men qurǵaq sıfrlardy ataýdan basqa mardymdy da qýantarlyq eshteńe aıtpady.
«Qazaqstandyqtar bul baǵdarlama arqyly jyl saıynǵy mólsherlemesi 7%, bastapqy jarnasy 20% jáne 25 jyldyq merzimde teńgemen nesıe esebinen turǵyn úı satyp ala alady. Eń aldymen, baǵdarlama talaptaryna sáıkes keletin turǵyn úı tańdalý kerek. Ekinshiden, baǵdarlamaǵa qatysatyn bankke baryp nesıe alý týraly ótinish jazylýy tıis. Úshinshiden, tabys resmı túrde rastalyp, jeke menshikte turǵyn úı bolmaýy tıis. Qazirgi ýaqytta jeti bank ótinish qabyldap jatyr», - dep D. Aqyshev bárimiz jatqa biletin sharttardy atap shyqqan.
Sonymen qatar ol qazirgi tańda 28 mlrd teńgege 2352 ótinim maquldanǵanyn aıta kele Astana, Almaty Shymkent qalalarynyń mańyndaǵy aımaqtar turǵyn úıdiń maksımaldy quny 25 mln teńge turatyn óńirler retinde sanalatynyn aıtty. Megapolıs qalalarda baspananyń qymbat bolýyna baılanysty atalǵan somamen shekteý keıbir bank klıentteri úshin tıimdi me?
Al, endi qarasańyz jaz ortasynan beri búkil Qazaqstan boıynsha tek 2352 ótinish qana túskeni, álbette, óte az ekeni túsinikti. Bul jerde basty gáp komersıalyq bankterdiń bul baǵdarlamaǵa asa qulyqty bolmaýy. Memleket tarapynan qarjy bólý kerek bolǵanda aýyzdaryn arandaı ashýǵa daıyn turatyn bankter nege osyndaı halyqqa paıdasy bar jobalarǵa qoldaý kórsete almaıdy. Ulttyq bank olardy ashsa alaqanynda, jumsa judyryǵynda ustaýǵa ókilettigi ábden jetkilikti bolǵanmen de onyń basshylyǵy tarapynan da mundaı erekshe qulshynysty baıqamadyq.
Atap, naqtylap aıtsaq, Qazaqstanda úısiz-kúısiz júrgen qansha otbasy bar eken jáne olardyń qansha paıyzyn osy baǵdarlama aıasynda qamtý kózdelgendigin nege D.Aqyshev myrza zerttep-zerdelemegen?
Árbir otyrysta bank termınologıasyn paıdalana otyryp, «ańqaý elge – aramza molda» prınsıpimen qalyń jurtqa túsiniksiz tilde aqpar bergendi qoıyp, halyqqa naqty paıdasy tıetin jumystardy atqarsa ǵana bizdiń atqaminerlerimizdiń abyroılary artar edi. Ony nazarǵa alyp, nátıje shyǵarýdy osy D.Aqyshev myrzaǵa taǵy senip tapsyraıyq.
Serikqazy Kókenaı
