«Aq jol» jetekshisi Azat Perýashev Májiliste ótken Dene shynyqtyrý jáne sport týraly zań jobasyn talqylaý barysynda birqatar máselelerge baılanysty óz kózqarasyn ortaǵa saldy.

«Memleket basshysy bıylǵy Joldaýynda áleýmettik ınfraqurylymnyń qoljetimdiligin qamtamasyz etýdi, 100 sport keshenin ashýdy jáne jańa sport ǵımarattarynda mektep oqýshylarynyń sportpen tegin shuǵyldanýyn qolǵa alýdy tapsyrdy. Nelikten Zań jobasynda bul normalar joq? «Aq jol» fraksıasy atalmysh zańǵa osyndaı talaptardy engizetin bolady», - dedi depýtat.

Ol memlekettik qarajatqa salynǵan keshenderdiń jeke menshik ıelerine berilip, keıin olardyń qarapaıym halyq úshin qoljetimsiz baǵalardy belgilegeni jóninde mysaldar keltirip ótti.

«Saıyp kelgende, bul nysandar sol balalardyń ata-analary tólegen salyqtarynyń esebinen salynady. Nelikten olardan aqsha talap etip, esikterin tars bekitedi? Bul jerde buqaralyq sport nemese qoljetimdi sport zaldary týraly qandaı sóz bolýy múmkin? Sodan keıin baryp ár jerden sheteldik legıonerlerdi shaqyramyz», - dep óz ashýyn jasyrmady Perýashev.

«Londonda ótken oıyndy esterińizge alsańyzdar 7 birdeı altyn medal! Elge úlken qýanysh ákeldi, árbir jeńimpazǵa 250 myń dollar aqshalaı syılyq, páterler, ordender...»

Al sodan keıin dopıng daýy, medaldardan aıyrylý, netken qorlyq edi.. Maneza, Chınshanlo, Podobedova ... Olar eń quryǵanda ózimizdiń otandastar bolsa ıgi edi, búkil ómirin qazaqstandyq sportqa arnaǵan. Olardy ne sebepti elge tartty? Alatyn aqshasyn alyp, keıin laqtyryp ketý úshin be sonda?

Jaqsy, bolashaqta sizder medalden aıyrylǵan jaǵdaıda syıaqylardy qaıtarýdy usynarsyzdar, al sizder sol legıonerlerden tym bolmasa memlekettik nagradalardy, ordenderdi qaıtaryp aldyńyzdar ma?», - dep surady ol. Vıse-mınıstr Sáken Musaıbekov dopıngti qoldanǵan jarystardan shettetilgen legıonerlerden memlekettik nagradalar qaıtarylyp alynbaǵanyn aıtty.

«Prezıdent aıtqandaı sport zaldaryn nege tegin etpeske, chempıondarymyzdy ózimiz daıyndap shyǵaraıyq», - dep túıindedi Perýashev. – Sizdiń mınıstrlikterińiz joǵary jetistikti sport túrine ǵana emes, balalar seksıasynan bastap buqaralyq sportqa da jaýap berýlerińiz qajet».

«Aq jol» jetekshisi sondaı-aq mınıstrlikti «Ádil oıynǵa» («FairPlay») qatysty tekseris jumystaryn júrgizýge shaqyrdy. Osy oraıda qoǵamnyń nazaryna iligip, túrli áńgimelerge negiz bolǵan Qyrǵyzstanda ótken álemdik «Kóshpendiler oıyndarynda» qazaqstandyq kókparshylardyń ózbek komandasynan utylyp qalǵany jóninde mysal keltirip ótti. Bul oqıǵa jurtshylyq pen jankúıerlerdiń kúshti reaksıasyn týǵyzyp, sporttyq etıka máseleleriniń betin ashty.

«Mınıstrlik kelisip alynǵan oıyndardy nazardan tys qaldyrmaı, mundaı ádiletsizdikke jol bermeýi kerek. Dál solardyń kesirinen talantty sportshylar ketýde, eldiń sporttyq abyroıyna nuqsan kelýde. «Aq jol» fraksıasy zań jobasyna sporttyq etıka jóninde osyndaı usynystardy engizedi», - dep atap ótti Perýashev.

S. Musaıbekov Kóshpendiler oıyndarynda oryn alǵan jaǵdaı baryp turǵan soraqylyq ekenimen kelisti. «Bizdiń kókparshylardyń barlyq kórsetkishter boıynsha ózbekterden jeńilip qalýy múmkin emes edi. Olar – álemniń myqtylary. Árıne, keleshekte arnaıy mehanızmderimiz bolýy qajet», - dep ol máseleniń mańyzdylyǵyn basa aıtty.