Menińshe, osy bir ádetke aınalyp bara jatqan jaǵymsyz úrdisti toqtatatyn kez keldi. Asqa barsań da, toıǵa barsań da - qazir ekeýi de bir. Dastarhanǵa qoıylǵan tamaqtan stol maıysyp turady. Toı ma, qaıǵy ma, qaraly kún be, búginde bári bir mereke bolyp qaldy. Bul – aqıqat.
Osyndaı jaıttardy kózimen kórgen bolýy kerek, keshe Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekpaev óziniń Facebook-tegi áleýmettik paraqshasynda asta-tók toıdan bas tartýǵa shaqyrdy.
-Úılený toılarynan túsirilgen beınebaıandar áleýmettik jelilerde jıi jarıalanady. Zal toly – gúl. Toı sahnasynda – shoý-bıznes juldyzdary. 500-600 adamdaı qonaq. Keıin anyqtalatyndaı, bir óńirdegi basqarmanyń basshysy qyzynyń nemese ulynyń úılený-uzatý toılaryn toılap jatady. Bul bútindeı bir úrdiske aınaldy, – dedi Alık Shpekpaev.
Rasynda da bul oılanatyn jaıt, bul másele birtalaıdan beri aıtylyp ta kele jatyr. Biraq ózgergen túk te joq. Qazir toı da, qaza da, as berý de, úılený toıy da, tipti súndet toı da básekege aınalyp barady. Yńyrshyǵy aınalyp, kúnin kóre almaı otyrǵan kedeı otbasy da, toı jasaýǵa qushtar. Úıdegi jumys isteıtini, sosyn nesıe alady. Mundaı jaǵdaıdyń barlyǵy da áser etedi, turmysqa, otbasyna, áleýmettik jaǵdaıyna. Biraq máseleni túsingenmen, dańǵoılyqty toqtata almaımyz. Nege? Múmkin memlekettik deńgeıde is-qımyl jasaý kerek shyǵar. Kórshimiz ózbek pen tájikten nege úlgi almaımyz? Mysaly, ózbek Senaty úılený toılary men qaraly jıynnan keıin beriletin asty qalaı ótkizý kerektigi jóninde búkilhalyqtyq talqylaýǵa salyp jatyr. Endi «ózbek erejesi» boıynsha birtalaı nárselerge shekteý qoıylady.
- Toılarǵa keletin adamdardyń sany 150 adamnan aspaýy kerek.
- Qaraly jıynǵa qatysatyndar sany 200-den aspaǵany durys.
- Asta beriletin palaýdyń merzimi 12.00 –15.00 saǵat arasynda berilýi tıis.
- Jas jubaılardyń toı korteji eki kólikten aspaýy tıis.
- Toıǵa bir ánshi nemese bir top qana shaqyrylady.
- Aldaǵy ýaqytta 200 orynnan artyq banket zaldaryn salýǵa ruqsat etilmeıdi.
- Eger bul talaptar júzege aspaǵan jaǵdaıda máseleni arnaıy komısıa talqyǵa salady.
- Eger talap oryndalmasa, erejeni buzǵandarǵa taǵy bir ret túsindirý jumystary júrgiziledi.
- Odan keıin aıyppul salynady.
♦Djordj Býsh qyzyn qalaı uzatty hám qazaqsha "ponttyń" "kapýt" bolatyn kezi keldi (foto)
♦Shymkentte ótken toıdaǵy tort qyzý talqyǵa tústi (foto, vıdeo)
♦"Qaı betimdi shymshıyn". Orystyń toıy "orys kelinniń" kózimen
Ózbekstannyń Podrobno.uz aqparat agenttigi habarlaǵanyndaı, atalǵan ereje eldiń qarapaıym azamattary men bıznes ókilderiniń bárine de birdeı teń jaǵdaıda qoldanylady.
Budan buryn da Ózbekstannyń prezıdenti Shavkat Mırzıeev te memlekettik sheneýnikterge toıǵa barýǵa tyıym salǵany belgili.
–Premer-mınıstrge, hokımderge, sonymen qatar, atqarýshy bıliktiń ókilderine toıǵa barýǵa qatań túrde tyıym salamyn. Eger sol kúni qandaı da bir memlekettik mekemeniń kóligin shaıhananyń mańynan kórsem, mindetti túrde qyzmetten bosatamyn nemese ol qylmystyq jaýapkershilikke tartylady. Mysaly, Tashkentte bes balasy bar otbasy qyzyn uzatýǵa aqsha tappaı, nesıe alǵan. Belshesinen qaryzǵa batty. Densaýlyǵyn qurtty. Aqyry amaly taýsylǵan soń ólgisi keldi. Mundaı toı kimge kerek?!, –dedi Prezıdent Shavkat Mırzıeev.
Mine ózbek ózgerip jatyr. Tájik te ysyrap ákeletin toılarǵa tyıym saldy. Qalaı aıtqanda da, qazaqqa «ózbek erejesi «kerek. Al biz she? Qyzdyń jasaýy men qudalyqtyń ózi toıǵa ketetin shyǵyndy eki ese orap alady. Qazaqstannyń iri qalalarynda 1000 adamǵa arnalǵan toıhanalar bar. Bul –abyroı! Áli asta-tók toı jasaýdy maqtan kóremiz. Dańǵoılyqty janymyz súıedi. Kim toı jasap, tabys tapty? Toı – qýanysh, biraq – shyǵyn. Olaı bolsa, únemdilikti qashan úırenemiz? Múmkin bizge de memlekettik dárejede toı men asqa qatysty shyǵyndardy shekteý týraly qatań sheshim qabyldaý qajet shyǵar...
Berik Beısenuly
