Almaty oblysynyń turǵyny óziniń ıdeıasyn alyp, keıin aqysyn bermeı ketkeni úshin Baıan Esentaevany aıyptady.

«Esentaeva aqymdy jedi» degen azamattyń áńgimesin NUR.KZ tilshisi tyńdap qaıtqan edi. Myna sýrettegi jigittiń esimi — Rınat Karımov. Rınat Almaty oblysynyń týmasy. Búginde ol  belgili aktrısa, ánshi, prodúser Baıan Esentaevany  «ýádesinde turmady» dep aıyptap otyr. «Men 2012 jyly «Traktorshynyń mahabbaty» fıliminde kórsetilgen negizgi oıdy Baıan Esentaevaǵa  telefon arqyly baıandap berdim. Fılmdegi oqıǵa jelisi men keıipkerler — meniń ıdeıam. Esentaevaǵa meniń aıtqandarym unady. Ol fılm shyqqan soń, negizgi tabystyń 30 paıyzyn beremin dep ýáde etti. Baıan hanym óziniń Almatyda emestigin aıtyp, qalaǵa kelgende kelisimshartqa otyratynyn aıtty. Alaıda, sol kúnnen beri telefon tutqasyn kótergen emes», — deıdi Rınat.

Rınat Karımov óziniń materıaldyq jaǵdaıy tómen ekenin, anasyn shuǵyl aýrýhanaǵa jatqyzý qajettigin aıtady.

Al Baıan Esentaevanyń ózine habarlasqanymyzda, ol suraǵymyzdy estigen soń biraz kúlip aldy. Sodan keıin «Sizder jýrnalıser qyzyqsyzdar. Meniń ondaı adammen múlde baılanysym joq. Biraz ýaqyt boldy,  sol jigit meni jamandap birneshe jýrnalısiń basyn qatyrdy. Men sizge aıtsam, ol — aqsha jasaǵysy kelip, ashyǵyp júrgen kedeı, jaǵdaıy joq jigit. Erteń taǵy bir jyndy  bolmashy jaıtty aıtyp, meni jamandaǵysy kelse, sony da jazasyzdar ma?», — dep ózimizge suraq qoıdy. Rınat Karımovtyń ózinen qandaı da bir  dálel suraǵanymyzda eshteńe kórsete almaıtynyn aıtty. «Qolymda eshqandaı dálelim joq. Quqyǵymdy zańdastyramyz degen kezde Baıan Esentaeva telefonyn kótermeı qoıdy. Ol qatelesip otyr. Fılmniń jartysy efırge shyqqanymen, áli aıaqtalǵan joq. Eger ol meniń aqymdy tólese, kınonyń qalaı támámdalaryn túsindirer edim», — deıdi Rınat.