Sońǵy kezderi áleýmettik jeli betterinde qazaq aqyndary men kúıshileriniń shyǵarmalaryn arzan kúlkige, ersi ermekke, árisi kelemejge aınaldyrýshylar jıilep barady. Áýelgisi qazaq toılarynda ataqty kúıshi Qurmanǵazy Saǵyrbaıulynyń "Adaı" kúıin áıeldiń áýertti jerine balap, shoý jasaǵanda jaǵamyzdy ustap, mundaı bassyz áreketke barǵandar jazalanýy tıis dedik. Aıtylǵan sóz aıtylǵan jerinde qaldy. Quzyrly mekemelerdegilerden "lám-mım" degen jan tabylmady. Osyǵan baılanysty "Qamshy" portalynda "Qurmanǵazynyń kúıin maqaztaǵandar jaýapqa tartylýy tıis" degen maqala jaryq kórdi, ári ol eshqashan ózektiligin, mańyzdylyǵyn joımaıdy.

Jalpaq jurt bolyp júrip, ataqty kúıshini arzan kúlki, ersi kelemejge ermek qylǵan asabany jazalaı almaı júrgenimizde Qaznette taǵy bir esersoq paıda bolypty.

"Atyń shyqpasanyń" kerin qylǵan bul jigit, anaý-mynaýdy qoıyp, qazaqtyń Bas aqyny sanalatyn Abaıdyń "Aıttym sálem, Qalamqas" ánin qorlaǵan.

Qorlaǵan. Biz qorlady dep bajaılaǵanymyzben, ánshi symaq jigit muny olaı qabyldamaıdy eken.

Sáýirdiń 4-i kúni Ýkraına astanasy Kıev qalasynda ótken  "Ýkraına daryndardy izdeıdi" («Ýkraїna maє talant-7″) jobasynyń jetinshi kezeńine, kastıngke barǵan qazaqstandyq reper-ánshi Tákejan Óteǵalıev bildeı Ýkraına sahnasynan qazaq aqynynyń lırıkalyq týyndysyn jyn-oınaq qylǵan.

Oǵan máz bolǵan zaldaǵy kórermender men qazylar alqasy reperdi shoýdyń ekinshi kezeńine ótkizip jibergen. Al, jekelegen múddeni kózdeıtin, keıbir qazaqstandyq BAQ "Qazaqstandyq reper Ýkraınalyqtardy tań qaldyrdy" dep jazyp, ánshisymaqty áspettep-aq jatyr. Ústine qazaqtyń ulttyq shapany men bórik kıip shyqqan Tákejan Óteǵalıev ándi óte keremet oryndady, energetıkasy mol eken degen syńarjaq maqtaýlar men qoshemetke masaıyp qalǵan Tákejannyń ózi de nelikten Abaıdyń ánin árin ketire oryndaǵanyn túsindirip baqqan.

"Aqynnyń bul áni mahabbat jaıly. Biraq, mahabbattyń eki jaǵy bolady ǵoı. Men bul lırıkalyq ándi jastardyń stılinde dınamıkasyn joǵarylatyp oryndadym",-deıdi Tákejan.

Dúnıeniń jer-jerinen talanttardy izdeıtin shoýdyń qazylary Vladıslava Iamy, Slava Frolova jáne Igorá Kondratúk Tákejanǵa alǵystaryn aıtyp, shoýdyń kelesi kezeńine ótkizip jibergen. Al Óteǵalıevtiń ózi bolsa, kelesi kezeńde qandaı kompazısıa oryndaıtynyn bilmeı basy dal bolyp júr.

Bul birinshi márte oryn alyp otyrǵan másele emes. Qazaq óneriniń altyn jaýharlary biriniń artynan biri qorlanyp jatqanda, mundaı bassyzdyqtarǵa beı-jaı qarap otyrýǵa bolmas. Kim bilsin, erteń Óteǵalıev shoýdyń ekinshi kezeńinde taǵy bir qazaq aqynyynyń shyǵarmasyn mazaqqa aınaldyrýy ábden múmkin ǵoı?!

Nurgeldi Ábdiǵanıuly