QR Mádenıet jáne sport mınıstrligi vedomstvonyń laýazymdy tulǵalary ustaldy degen memlekettik qyzmet isteri jáne sybaılas jemqorlyqqa qarsy is-qımyl agenttiginiń málimetine qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap. 

"Sotqa deıingi tergep-tekserý derekteri jarıa etilmeýge tıis. Qazirgi tańda sotqa deıingi tergep-tekserý amaldary júrgizilýde. Sondyqtan tergeý isi bitpeı, Qazaqstan Respýblıkasy Mádenıet jáne sport mınıstrliginiń qyzmetkeri aıypty deýge haqymyz joq. Qazirgi tańda barlyq qyzmetker jumys ornynda", — dep jazylǵan mınıstrlik taratqan habarlamada. 

Aıta keteıik, búgin memlekettik qyzmet isteri jáne sybaılas jemqorlyqqa qarsy is-qımyl agenttigi mádenıet jáne sport mınıstrliginiń laýazymdy tulǵalary ustalǵanyn habarlady. Biraq agenttiktiń resmı ókili qansha adamnyń ustalǵanyn naqtylaǵan joq. Ol qazir sotqa deıingi tergeý júrgizilip jatqanyn, basqa aqparattyń zańǵa sáıkes jarıa etilmeıtinin jetkizdi.

Al keıin Astana sotynyń baspasóz qyzmeti mınıstrliktiń ákimshilik departamentiniń dırektory Erenaı Dárjibaevtyń 24 jeltoqsanǵa deıin úıqamaqqa alynǵanyn habarlady.

Mádenıet mınıstrliginiń baspasóz qyzmetiniń habarlaýynsha, Erenaı Dárjibaev 2014 jyldan mádenıet jáne sport mınıstrliginde jumys isteıdi. Ol qarjy mınıstrliginde memlekettik satyp alý ádisnamasy basqarmasynyń basshysy, Joǵarǵy sot janyndaǵy sottardyń qyzmetin qamtamasyz etý komıtetiniń Qostanaı oblysy sottar ákimshisi, Gýmılev atyndaǵy Eýrazıa Ulttyq ýnıversıtetiniń ákimshilik departamentiniń dırektory, Bilim mınıstrliginde basqarma basshysy qyzmetterin atqarǵan. 

"Sondyqtan, tergeý amaldary aıaqtalmaı, laýazymdy tulǵany aıypty dep qorytyndy jasaýǵa asyqpaǵan jón", — dep málim etti mınıstrliktegiler.