Qytaı Halyq Respýblıkasynda halyqaralyq mergender saıysy ótti.  Qazaqstan atynan jarysqa túsken Ulttyq ulan «Búrkit» arnaıy jasaǵynyń jaýyngerleri tórt nomınasıasynyń nátıjesi boıynsha ekinshi komandalyq orynǵa ıe boldy, dep habarlaıdy Qamshy.kz aqparat agenttigi. 

Mergender jarysyna álemniń 21 elinen 100 mergen qatysty. Ulttyq ulannyń «Búrkit» arnaıy jasaǵy dáldep atýdan kúsh synasyp, zor jetistikterge qoljetkizdi.

Aıta ketý kerek, qazaqstandyq mergender «Keshendi jaýyngerlik snaıpıng» nomınasıasy boıynsha ekinshi orynǵa ıe boldy. Jattyǵýlar taýly aımaqta ótti. Mergender 10-nan bastap 600 metrge deıingi ara qashyqtyqta, jeti núkteden tapansha men mergendik myltyqtan oq atty. 

Toptyq snaıpıngte de qazaqstandyqtar jaqsy nátıje kórsetti. Ulttyq ulannyń mergenderi  baqylaý jáne baǵyt tabý, tańdaýly nysanalardy tabý jáne taýdaǵy alys qashyqtyqta izdeý atysy jattyǵýlary boıynsha 3 jáne 5 oryndardy ıelendi.

Ulttyq ulannyń «Búrkit» arnaıy jasaǵyna tutqyndardy bosatý tapsyrmasy boıynsha jattyǵýdy jaqsy jasady. Qazaqstandyq komanda barlyq tórt jyljymaly «lańkes-tutqyn» nysandaryna dál tıip, barlyq qatysýshylar arasynda úzdik nátıje kórsetti. Budan bólek arnaıy jasaq jaýyngerleri eki oqpen eki nysanǵa tıgizip arnaıy júlde jeńip aldy.

Jarysty Qytaıdyń Halyqtyq qarýlanǵan polısıasy uıymdastyrdy. Onyń maqsaty - ár eldiń antıterrorlyq kúshteri arasynda tájirıbe almasý jáne dostyqty kúsheıtý.

Budan bólek, jarys terorızmmen kúreste áleýetti ári qaraı damytýǵa, sondaı-aq, mergenderdiń jaýyngerlik daıarlyǵyn jáne kásibı biliktiligin kóterýge baǵyttalǵan.

Antıterorlyq arnaıy operasıanyń erekshelikterin eskere otyryp, atalmysh jarystar 12 pándik tórt sanattan quraldy. Onyń ústine, ár túrli jarystar ár jerde bir mezette ótkizildi.

Eki jylda bir ótetin jarys alǵash ret 2016 jyly Beıjińde 15 eldiń qatysýymen ótken.