Bıyl «Altyn qalam 2018» ádebı baıqaýy jetinshi ret uıymdastyryldy. Almaty qalasynda elimizge jáne shetelge keńinen tanylǵan ARTıSHOK teatrynda 2018 jyldyń qorytyndysy shyǵarylyp, «Altyn qalam 2018» ádebı júldesiniń jeńimpazdardy marapattaý keshi ótti.
Bıyl ádebı konkýrsty uıymdastyrý komıtetiniń jáne qazylar alqasy quramyna Dosym Satpaev, Aıdos Sarym, Arman Shoraev, Nurjan Muhamedjanova, Rasýl Jumaly, Kenje Jumanuly, Qýat Dombaı, Beknýr Qısyqov, Baıǵalı Esenálıev, Dildágúl Nurmahanbet, Tatána Fılıpchık jáne basqalar endi.
«Altyn qalam 2018» ádebı baıqaýynda qazaqtan shyqqan alǵashqy mesenattardyń biri Esenqul Mamanov atyndaǵy syılyq «Qazaqtyń úzdik romanyna berildi». Bas júlde 1 mıllıon teńgeni aqyn, jazýshy, jýrnalıs Aıdyn Kálimhanǵa buıyrdy. Al balalar jazýshylaryna arnalǵan «Daraboz» baıqaýynyń bas júldesin jáne 1 mıllıon teńgeni prozalyq jáne syn-zertteý kitaptarynyń avtory, fılologıa ǵylymdarynyń doktory, Halyqaralyq Shyńǵys Aıtmatov akademıasynyń akademıgi Beken Ybyraıym jeńip aldy.
Aıta ketetin jaıt, qazaq ádebıetiniń janashyry, tanymal mesenat Oljas Qudaıbergenov bıyl «Altyn qalam» baıqaýynda fantasıka janrynda jazylǵan úzdik shyǵarmaǵa óz atynan 1 mıllıon teńge syıaqy daıyndaǵan. Atalmysh júldege belgili qalamger, «Aıqyn» gazetiniń bas redaktory Nurtóre Júsip ıe boldy.
Jyldaǵy dástúr boıynsha «Altyn qalam 2018» baıqaýyna jumystar naýryz aıynan bastap qyrkúıek aıynyń ortasyna deıin qabyldanǵan bolatyn, oqyrmandar ǵalamtor arqyly ózderine unaǵan, úzdik dep tapqan shyǵarmalarǵa qazan aıynyń aıaǵyna deıin daýys berip, ár nomınasıa boıynsha úsh úmitkerdi anyqtaǵan. Saıysqa túsken barlyq shyǵarma www.akalam.kz resmı saıtynda jarıalanǵan. Oqyrmandardyń qoldaýy jáne qazylardyń tańdaýy boıynsha ár atalym boıynsha jeńimpazdar anyqtalyp, syı-syıapattarǵa ıe boldy.
«Altyn qalam 2018» ádebı baıqaýynyń júldegerleri tómendegideı boldy:
«Jyldyń úzdik prozasy» - Esbolat Aıdabosyn
«Jyldyń úzdik kınosenarııi jáne dramatýrgıasy» - Dúısen Keńes
«Jyldyń úzdik balalar jáne jasóspirimder ádebıeti «Daraboz» - Beken Ybyraıym
«Jyldyń úzdik satırasy» - Qanaǵat Ábilqaıyr
«Jyldyń úzdik fantasıkasy jáne detektıvi» - Nurtóre Júsip
«Qazaqtyń úzdik romany» - Aıdyn Kálimhan
«Qazaq ádebıetine qosqan eleýli eńbegi úshin» - Dýlat Isabekov
«Jyldyń úzdik poezıasy» oryssha – Kalmagambetova Larısa
«Jyldyń úzdik prozasy» oryssha – Valýıskıh Dına
«Jyldyń úzdik balalar jáne jasóspirimder ádebıeti» oryssha – Aızakova Janargýl
«Esenjol Dombaı atyndaǵy arnaıy syılyq, jyldyń úzdik satırasy» oryssha – Teplýhın Arkadıı
«Jyldyń úzdik fantasıkasy men detektıvi» oryssha – Bychkov Nıkolaı
«Jyldyń úzdik kınosenarııi men dramatýrgıasy» oryssha – Kolchenko Larısa
