Nursultan Nazarbaev Álibek Dinishevtiń Qazaqstan mádenıeti men ónerin damytý jáne ilgeriletý isindegi aıryqsha róli men sińirgen eńbegin atap ótti, dep jazady Qamshy.kz aqparat agenttigi Aqordaǵa silteme jasap.

Memleket basshysy halyq ártisiniń Astana qalasy men búkil táýelsiz Qazaqstannyń qalyptasý úderisterine kýá bolyp, belsendi atsalysyp kele jatqanyn aıtty.

Nursultan Nazarbaev Á.Dinishevti elordanyń 20 jyldyǵyna oraı «Astana Opera» teatrynda qoıǵan konsertiniń tabysty ótýimen quttyqtady. 

Halyq ártisi Qazaqstan Prezıdentiniń shyǵarmashylyq salasyndaǵy saıasatyna jáne memlekettiń óner qaıratkerlerine qoldaý kórsetip otyrǵanyna rızashylyq bildirdi.

– Men Astananyń mereıtoıyn atap ótýge úles qosýdy paryzym dep bilemin. Egemen elimizdiń mádenıetin qalyptastyrý kezinde Sizben birge bolǵanymdy maqtan etemin. Bul jolda kóptegen qıynshylyqtar eńserildi. Qazir bári túbegeıli ózgerdi, teatrlarǵa keremet jaǵdaı jasaldy. «Astana Opera» – sonyń jarqyn mysaly. Onyń sahnasynda án aıtý – zor qýanysh, – dedi Á.Dinishev.

Kezdesý sońynda Nursultan Nazarbaev pen Álibek Dinishev «Lúblú tebá, moı kraı rodnoı» ániniń (sózi – I.Nazalevıchtiki, mýzykasy – G.Podelskııdiki) úzindisin aıtty.