Kezdesý barysynda azamattyq avıasıany damytý máseleleri, sondaı-aq «Eır Astana» áýe kompanıasynyń qazirgi ahýaly men aldaǵy perspektıvalary talqylandy.
– «Eır Astana» – bizdiń negizgi áýe tasymaldaýshy kompanıamyz. Biz ony Rıchard Evanspen birlese qurdyq. Osy jyldar ishinde kóp jumys atqaryldy. Búginde kompanıa jaqsy qyrynan tanylyp, oń ımıj qalyptastyrdy, – dedi Nursultan Nazarbaev.
Kezdesýge qatysýshylar Qazaqstan Prezıdentine álemdik áýe tasymaly naryǵyndaǵy sońǵy úrdister jóninde aıtty. Sonymen qatar, Nursultan Nazarbaevqa ushý qaýipsizdigin qamtamasyz etýge qatysty azamattyq avıasıany basqarýdyń brıtandyq modeliniń elementterin engizý maqsatymen atqarylyp jatqan jumystar jóninde baıandaldy.
Investısıalar jáne damý mınıstriniń málimetine sáıkes, 2018 jyly Qazaqstanda 13 baǵyt boıynsha áýe reısteri ashylyp, Astana qalasynda «ashyq aspan» pılottyq jobasy iske asyryldy.
Kezdesý sońynda Memleket basshysy áýe tasymaly qyzmetiniń halyqqa qol jetimdiligin arttyrýdyń mańyzdylyǵyn atap ótip, «Eır Astana» kompanıasynyń bazasynda tómendetilgen tarıf boıynsha kólik qyzmetin kórsetetin búdjettik áýe kompanıasyn qurýdy tapsyrdy.
